Ижтимоий тармоқларда Тошкент шаҳар туманларидан бирида яшовчи 12 ёшли О. исмли бола ҳақида - мактабга бормаслиги, оиласининг ёлғиз боқувчиси экани, ота-онасининг расмий никоҳи йўқлиги боис отаси улардан хабар олмаслиги ҳақида материал тарқалган эди. Ҳолат юзасидан Оила ва хотин-қизлар қўмитаси ахборот хизмати изоҳ берди.
Айтилишича, ҳолат Учтепа тумани ҳоким ўринбосари – Оила ва хотин-қизлар бўлими бошлиғи раҳбарлигидаги ишчи гуруҳи томонидан ўрганилган.
“Ўрганишлар жараёнида ҳолатлар ўз тасдиғини топмади. Жумладан, боланинг отаси Ж.К. қурилиш фирмаси раҳбари экани, оиланинг моддий таъминотида етишмовчилик йўқлиги аниқланди. Шунингдек, бола 5 йил эмас, оилавий шароити туфайли 2 ойга яқин муддатда мактабга бормаган.
Унинг отаси ва онаси билан суҳбатда кейинги пайтларда боланинг хулқида ўзгаришлар кузатилаётгани, ота-онаси компьютер ўйинлари учун пул бермагани сабабли боланинг ўзи шу йўл билан пул топишга урингани, бундан кейин фарзанди тарбиясига алоҳида эътибор қаратишлари маълум қилинди”, — дейилади расмий муносабатда.
Қўмита блогер ва журналистлар, бошқа кенг жамоатчилик вакилларидан ўз ахборотини тарқатишда холис бўлишларини сўраган.
Изоҳ (0)