Ўзбекистон халқ таълими вазири Шерзод Шерматов томонидан Тошкент шаҳар халқ таълими бош бошқармасига жўнатилган хатда шаҳардаги мактабларда ноқонуний равишда турникетлар ва кузатув камералари ўрнатиш ниқоби остида ота-оналардан пул йиғишларни тўхтатиш сўралган. Бу ҳақда «Дарё»га Халқ таълими вазирлигидаги манба маълум қилди.
Вазирликнинг бош бошқармага жўнатилган расмий хатига кўра, Халқ таълими вазирлигига ижтимоий ҳамда мобил операторлар тармоқлари орқали ота-оналарнинг ўз фарзанди тарбиясидаги масъулиятини оширишга қаратилган ижтимоий хабарларни юбориш тизимини жорий этиш, шунингдек, тажриба-синов тариқасида Тошкент шаҳридаги умумтаълим муассасаларида ўқувчилар давоматини назорат қилиш электрон ахборот тизимини яратиш вазифалари юклатилган. Бу вазифа Ўзбекистон Президенти раислигида 2019 йил 23 августда ёшларни ватанпарварлик руҳида тарбиялаш ва жамиятда ўқитувчи мавқеини ошириш масалаларига бағишлаб ўтказилган видеоселектор мажлиси баёнида белгилаб қўйилган.
Ушбу йўналишда хусусий сектор инвестициялари жалб қилиниб, электрон ахборот тизими тажриба-синовдан ўтказилмоқда, дейилади вазирлик хатида.
Вазирлик томонидан қайд этилишича, Тошкент шаҳридаги аксарият умумтаълим мактаблари директорлари томонидан ўзбошимчалик қилиниб, мактаб кузатув кенгаши аъзолари ва ота-оналар фикрларини чалғитган ҳолда ноқонуний пул йиғимлари билан шуғулланиб, турли хилдаги турникетлар ҳамда кузатув камералари ўрнатилмоқда.
Шу муносабат билан вазирликнинг хатида Тошкент шаҳар халқ таълими бош бошқармаси бошлиғидан бошқарма тасарруфига кирувчи таълим муассасаларида ноқонуний равишда турникетлар ва кузатув камералари ўрнатиш ниқоби остида ота-оналардан пул йиғишларни тўхтатиш сўралган.
Аввалроқ халқ таълими вазири ўринбосари Дилшод Кенжаев 17 октябрь куни барча ҳудудий бошқармаларга расмий хат юборгани, унда ҳукуматнинг 2019 йил 14 октябрдаги видеоселектор мажлиси ижросини таъминлаш мақсадида 2019—2020-ўқув йилининг 2-чорагидан бошлаб дарс ва машғулотлар ҳар куни Ўзбекистон мадҳиясини куйлашдан бошланиши белгилангани ҳақида хабар берилган эди.
Изоҳ (0)