Қашқадарё вилояти маъмурий маркази — Қарши шаҳридаги 11-мактабда 8 март баҳона 1-синф ўқувчиларидан ўқитувчига совға олиш учун пул йиғиш бошланган. Бу ҳақда «Дарё»га маълум қилган мурожаатчининг сўзларига кўра, ўқувчилардан 50—100 минг сўмдан пул йиғилмоқда.
Аудиоёзувдаги гаплар
Ота-оналар суҳбати ёзиб олинган аудиоёзувда таъкидланишича, 1-синф ўқувчиларидан саводхонлик байрами ҳамда 8 март байрамини ўтказиш учун 50 минг сўмдан пул йиғилмоқда. Пул Дилфуза исмли ўқитувчи учун эканлиги айтилади.
«Рус синфлар 100 минг сўмдан пул йиғаётган экан, ўзбек синфларнинг ҳам улардан кам жойи йўқ», — дейди пул йиғиш ташаббуси билан чиққан ота-оналардан бири. Бу гапга жавоб берган суҳбатдош: «Қизимнинг ўқитувчиси билан ёмон бўлиб қолишини истамаганим учун ҳам бунга қарши чиқолмайман, тўғрими?», — деб савол қўйган.
Ўз навбатида пул йиғиш мажбурий эмаслиги, ким хоҳласа, 10 минг, ким хоҳласа, 20 минг сўмдан бериши мумкинлиги айтилган. Аммо гап сўнгида совға олиш учун пул берганлар рўйхати ўқитувчига берилиши қўшимча қилинган. Аудиоёзувдаги мулоқотга кўра, Дилфуза-ўқитувчининг туғилган куни ва 1 октябрь байрамига ҳам пул йиғилган ва ўқитувчининг ўзига берилган.
«Биз ўқитувчини рағбатлантирсак, улар ҳам ўқувчиларни рағбатлантиради. Чунки ўқитувчилар ҳам ўзаро гаплашишади-да — кимнинг синфи қанча йиғиб берганини. Шунинг учун кўнглингиздан чиқариб беринг», — дейди овози аудиога ёзилиб қолган ота-оналардан бири.
Ота-оналардан бирининг муносабати
Байрам баҳона ўқитувчи учун пул йиғилишидан норози бўлган ота-оналардан бирининг исми сир қолиши шарти билан «Дарё» мухбирига айтишича, ушбу жараёндаги асосий зиддият — пул берган ота-оналар рўйхати ўқитувчига тақдим этилишида.«Шунинг учун ҳам бу жараёнга қарши чиқиб бўлмайди. Ўша рўйхатда ким неча пул бергани ёзилади ва синф раҳбарига берилади. Синф раҳбари, хоҳлайсизми-йўқми, пул берган ва бермаганларни бир-биридан ажратади, ота-онаси пул бермаган ўқувчиларга бошқача муносабатда бўлади», — дейди у.
Вазир нима дейди?
Ўзбекистон халқ таълими вазири Шерзод Шерматов 2020 йил январида Ёшлар пресс-клубида қиган чиқишида мактабларда ота-оналар ташаббуси билан пул йиғиш ҳолатларига тўхталиб ўтган эди.
«Яна бир нарсани инобатга олиш лозим: ўқитувчи ҳам мажбуран шуни қилгин, демайди. Ота-оналарнинг ўзлари келишиб, ўртада пул йиғишади. Қўштирноқ ичидаги ташаббускор ота-оналаримиз ҳам жуда кўп. Ҳамма ўзаро келишиб, ортиқча қийинчилик туғдирмай, шароит яратиб ёрдамлашса, яхши бўларди», — деганди вазир.
Айни вақтда вазир Шерматов «‘йиғди-йиғди’ларга мажбурланаётганлар бўлса, ҳуқуқни муҳофаза қилувчи органларга мурожаат этсин» деганди, бироқ ҳақини талаб қилган ота-оналарнинг фарзандлари кейинчалик ўқитувчилар томонидан ажратиб қўйилиши эҳтимоли масаласи очиқ қолганди.
Изоҳ (0)