Америка ва Европа давлатларида шундай одат бор: фарзандларининг сут тишлари тушганда уларга “тиш париси” бирор совға олиб келади. Сўнгги йилларда болалар совға сифатида қимматбаҳо буюмларни сўраш ҳолатлари кўпайиб кетди. Бу ҳақда The Wall Street Journal ёзмоқда.
2023 йилда стоматология соҳасидаги суғурта компанияси “Delta Dental” сўровнома ўтказди. Унга кўра, тушган сут тиши учун ҳар бир болага тахминан 6,23 доллар тўланади, болаларнинг 20 фоизи совға ҳам олади.
Улар ота-онасидан турли нарсалар талаб қилади. Масалан, пул, компьютер ўйинлари, iPhone олиб беришни сўрайди. Бу борада ота-оналар ўзаро рақобатлашиб, фарзандларига бошқаларникидан аъло совға олишга ҳаракат қилади.
Буюк Британиялик Чидера Ниг маҳаллий газетага айтиб беришича, тиш париси қизига 60 фунт стерлинг пул, табрикномалар, кумуш занжир ва Louis Vuitton билакузугини “совға қилган”. Катта сарф-харажатни ота-оналар фарзандини шу тариқа қўллаб-қувватлаши билан изоҳлашади.
Юқоридаги фикрга қўшилмайдиган ота-оналар ҳам бор. Жанубий Каролинадаги официант Женни Пирс олти ёшли ўғлига тушган сут тиши учун 2 доллар ҳадя қилган. У канадалик бир аёл қизига 100 АҚШ доллари совға қилганини эшитиб, таажжубда қолган.
Менимча, сут тишлари тушишини байрам қилиб юбориш керак эмас. Совға ортидан ота-оналар ўзаро рақобатлашиш ўрнига фарзандига кўпроқ эътибор ва меҳр бериши ҳар қандай моддий бойликдан афзалроқ, — дея фикр билдирди Пирс.
Изоҳ (0)