Қарши шаҳар халқ таълими бўлими 11-сонли мактабда 8 март байрами арафасида 1-синф ўқувчиларидан 100 минг сўмгача пул йиғилаётгани ҳақидаги хабарга муносабат билдирди. Қарши шаҳар халқ таълими бўлими мудири Абдуғани Ҳимматовнинг «Дарё»га маълум қилишича, мазкур ҳолат ота-оналар ташаббуси бўлиб, 2 нафар ота-онанинг ўзбошимчалиги бўлган.
«Дарё» мухбирига тақдим этилган аудиоёзувда 2 нафар ота-она суҳбати ёзилган бўлиб, унда суҳбатдошлар 8 март байрами арафасида ўқитувчига пул йиғилаётгани, рус синфларда 100 минг сўмгача пул олинаётганию, ўзбек синфларининг ҳам улардан ками йўқлиги ҳақида сўз юритади. Бунга жавобан эса иккинчи суҳбатдош мазкур «йиғди-йиғди»дан бош тортса, ўқитувчининг фарзандига нисбатан фикри ўзгариб қолишидан қўрқаётганини таъкидлайди.
«Аниқланишича, оналардан икки нафари мактаб маъмурияти ва синф ўқитувчиси Ражабова Дилфузани хабардор қилмасдан ўзларича маслаҳат қилишган, — дейди халқ таълими бўлими мудири Абдуғани Ҳимматов.
Мазкур ҳолат 5 март, пайшанба, куни ота-оналар иштирокида муҳокама қилинган.
«Мактабга таклиф этилган 34 нафар ота-она мактаб ўқитувчисига пул маблағи бермаганликларини ҳамда мактаб маъмурияти ва синф ўқитувчисининг мазкур ҳолатдан хабари йўқлигини билдириб, тушунтириш хатлари ёзиб беришди, — дейди Абдуғани Ҳимматов.
Абдуғани Ҳимматов иштирокида бўлиб ўтган муҳокама сўнгида шаҳар халқ таълими бўлими ота-оналарга тадбирлар ва бошқа мақсадларда ўқувчилардан пул йиғиш мумкин эмаслигини, шундай ҳолат юз берган вақтда ўқувчиларнинг ота-оналари дарҳол шаҳар халқ таълими бўлимига хабар бериши лозимлигини эслатган.
Масъуллар мазкур мақола учун «Дарё» таҳририятига миннатдорчилик билдириш баробарида «удум»га қарши муросасиз курашишини маълум қилган.
Изоҳ (0)