Shayxontohur tumanidagi umumta’lim maktablaridan birining 2-sinfida tahsil oluvchi o‘quvchilarning ota-onalari 1-oktyabr — O‘qituvchi va murabbiylar kuni munosabati bilan millionlab pul yig‘moqda. Bu haqda “Daryo”ga bildirgan murojaatchilarga ko‘ra, ushbu sinfda tahsil oluvchi ota-onalar tashabbusi bilan har bayramda pul yig‘ish odat qilingan.
“Daryo”ga kelib tushgan audioyozuvlardan anglashilishicha, ushbu maktabda (maktab raqami tahririyatga ma’lum, biroq murojaatchining istagiga ko‘ra sir saqlanmoqda) o‘qituvchining 1-oktyabrda olgan sovg‘asi yoki pulining ko‘pligiga qarab reytingda qaysi o‘rinda turishi tahlil qilinadi.
Oldingi safar ham (2023-yilning 1-oktyabr sanasi nazarda tutilmoqda, tahririyat izohi) juda kam pul berganmiz, ancha orqadamiz. U yerda senga necha pul berishdi, senga qancha berishdi, degan muhokama bo‘ladi-da. To‘g‘ri, Zilola aytmaydi, o‘zi bilib-bilib ishini qilar, lekin uyaladi. Baribir solishtiriladi, deydi guruhda onalarni pul berishga undagan fuqaro.
Ko‘pchilikni o‘qituvchi uchun pul yig‘ishga undagan ona 2-sinf o‘qituvchisiga 500 ming so‘m yig‘ilishini uyatli holat deydi.
Katta sinfda o‘qiydigan bolalarim uchun kamida 100 ming so‘mdan, dollar demayman-u, so‘mda yig‘amiz. Milliondan oshadi-da. Bularda esa 500 ming so‘m yig‘ildi endi, deydi farzandi 2-sinfda tahsil oluvchi o‘quvchi qizning onasi.
Tahririyatga audioyozuvi yuborilgan onaning aytishicha, shu maktabning 11-sinfida o‘qiydigan farzandining o‘qituvchisiga ayni kunga qadar 1 million so‘mdan ortiq pul yig‘ilgan.
Biz ham harakat qilaylik, hech bo‘lmasa 20 kishi bersin. 1 million bo‘lsin, shundoq konvertga solib beraman-da. Gul yoki shokolad qilib o‘tirmayman, o‘ziga pulni beraman, kerakli narsa oladi, deydi bayram uchun ota-onalardan pul yig‘ishni odat qilgan “kassir ona”.
Shu o‘rinda suhbatga qo‘shilgan onalardan biri Surayyo ismli onaga murojaat qilib, shokoladga pul ketkazmaslikni, pulning o‘zini berishni maslahat berib, “Feruza opam to‘y qiladigan, pulini bersak, kam-ko‘stiga ishlatar”, deydi.
O‘qituvchining kasb bayrami uchun onalardan pul yig‘ayotgan “kassir ona” ayollarni erini aldab, pul olishga undaydi.
Bermaganlar, pulini beringlar, harakat qilinglar, eringlarga uni olaman, buni olaman, deb olvolinglar. 50 ming so‘m hozir pulmas-da. Bir xillarga puldir, ammo bizga pulmas-da, deydi “kassir ona”.
Audioyozuvda ovozi yangragan onaning aytishicha, Shayxontohur tumanidagi 180-maktabda boshlang‘ich sinf o‘quvchilaridan o‘qituvchilar bayrami uchun 150-200 ming so‘mdan pul yig‘ilmoqda.
Maktab o‘qituvchilari uchun pul yig‘ish masalasiga qarshiligini bildirgan onalardan biri Gulnora Alimova boshlang‘ich sinflarda tashkil etilgan ota-onalar qo‘mitasining shunday paytda tashabbuskor bo‘lib qolishini aytib, bunday tashabbuskorlikni qoralamoqda.
Ota-onalar qo‘mitasining faolligi faqat shu bayramda sezilsa kerak, hoynahoy, nega sifatli ta’lim borasida gap ketganda ham shunaqa tashabbuskorlik bo‘lmaydi ularda, shunisi qiziq. Bunday holat mening farzandlarim o‘qiyotgan maktablarda ham sezilmoqda. Oxirgi uch-to‘rt kunda ota-onalar qo‘mitasi pul yig‘ishga shunchalik kirishib ketishganki, ular O‘zbekiston qonunchiligini esdan chiqarib, o‘zboshimchalik qilmoqda. Ota-onalardan pul yig‘ib, uni xuddiki o‘zi berayotgandek tutayotgan onalar bu orqali farzandini o‘qituvchiga yaqinlashtirishni, o‘qituvchini shu yo‘l orqali muttaham qilib, farzandining ayblariga ko‘z yumishga undayotgandek. Bu bizga nima beradi? Sifatsiz ta’lim, qoloq o‘quvchi va tamagir o‘qituvchilarni ko‘paytiradi, deydi u.
“Daryo” jurnalisti bilan suhbatda bo‘lgan Shayxontohur tuman maktabgacha va maktab ta’limi bo‘limi mudiri o‘tgan shanba va dushanba kunlari maktablarda o‘qituvchilar bayramiga pul yig‘ish taqiqlanganini eslatganini ma’lum qildi.
Bayramga pul yig‘ib o‘qituvchiga qimmatbaho sovg‘a, qanaqadir taqinchoqlar olishni taqiqlaganmiz. Har bir maktabda kuzatuv kengashlari ham ish boshlagan bo‘lib, bunga qarshi kurashyapmiz, deydi bo‘lim mudiri.
Izoh (0)