Ижтимоий тармоқларда «Сергели туманидаги 284-мактаб 1-синф ўқувчиларининг ота-оналаридан дарсликларнинг 5 таси учун 100 минг сўмдан пул тўлашибди. Бундан ташқари, мактабни камералаштириш учун ҳар синфдан салкам 1 миллион, хоналарни жиҳозлаш учун ҳам пул сўралаётган эмиш» мазмунидаги хабар тарқалганди. Ҳолат Тошкент шаҳри халқ таълими бош бошқармаси томонидан ўрганилди.
Таъкидланишича, бугунги кунда 284-сонли умумтаълим мактабида 2431 нафар ўқувчи таълим олмоқда. Янги ўқув йилида 1-синфга 279 нафар ўғил-қиз қабул қилинди. Шулардан 174 нафар ўқувчига рус тилида таълим берилмоқда. Амалдаги ўқув йилида ўқувчилар сонининг режадагига нисбатан кўпайгани эвазига уларни дарслик билан таъминлашда узилиш рўй берган. Мазкур масалани ижобий ҳал қилиш бошқа ҳудудлардан орттирилган дарсликлар ҳисобига қопланган.
Президентнинг тегишли фармонларига мувофиқ, ўқувчилар давоматини масофадан мониторинг қилиш, ўқувчиларнинг келиш ва кетиш вақтлари назорати билан боғлиқ бўлган ўқув жараёнини автоматлаштириш тизимларини жорий этиш вазифаси топширилган. Жумладан, мазкур топшириқ ижросини таъминлаш мақсадида 284-мактабга овозли видеокамералар ўрнатилган. Бу ишлар тўлиқ ҳомийлар кўмагида амалга оширилган.
«Ҳурматли ота-оналар! Эслатиб ўтамиз, мактабларда дарсликлар билан муаммоли ҳолат юзага келганда, ота-оналарнинг мурожаат қилишлари учун @bookedu_bot махсус Telegram боти ишга туширилган. Агар сизда ушбу ҳолат юзасидан бирор савол пайдо бўлса, юқоридаги манзилда кўрсатилган бот орқали батафсил жавоб олишингиз мумкин», — дейилади муносабатда.
Изоҳ (0)