Ижтимоий тармоқларда Ўзбекистон Халқ таълими вазирлиги ўқитувчилардан ота-оналарни электрон кундалик обунасини узайтиришга мажбурлашини талаб қилаётгани ҳақида маълумот пайдо бўлди. Вазирлик матбуот хизмати бундай маълумотлар юзасидан изоҳ берди.
«Халқ таълими вазирлиги ‘Кундалик’ тизимига обуна бўлиш ота-оналар учун ихтиёрийлигича қолаётганини эслатиб ўтади. Халқ таълими вазирлиги томонидан ўқитувчиларга ота-оналардан обунани узайтиришни талаб қилиш бўйича оғзаки ёки ёзма буйруқ берилмаган», — дейилади вазирлик баёнотида.
Айни вақтда, вазирлик матбуот хизматининг қайд этишича, электрон журнал ва кундаликлардан фойдаланадиган мактаб ўқитувчилари «Таълим тўғрисида»ги қонунга мувофиқ ота-оналарга фарзандларининг тарбияси ҳамда умумий ўрта таълим олишлари учун масъулиятлари доирасида обунани узайтиришни эслатиш ҳуқуқига эгадирлар.
Шунингдек, вазирлик 2020/2021-ўқув йилида ‘Кундалик’ тизимига обуна нархи ойига эмас, йилига 8600 сўмни ташкил этишини эслатиб ўтган — бу пулга платформанинг барча функцияларидан фойдаланиш мумкин. «Бошқа ҳеч қандай алоҳида тўлов амалга оширилмайди», — дейилади вазирлик баёнотида.
Ўзбекистон мактабларида «Кундалик» электрон тизимини татбиқ этиш 2019 йилдан бошланган эди. Бошланғич даврда тизимдан фойдаланиш бепул бўлган, 2020 йил ноябридан пуллик тартибга ўтган. Ўшанда тизимдан бир йиллик фойдаланиш баҳоси бир ўқувчи учун 9200 сўм эди.
Ушбу тизимнинг татбиқ этилиши ўқитувчи ва ота-оналарнинг барчаси томонидан ҳам бирдек илиқ кутиб олинмаган. Хусусан, Халқ таълими вазирлиги томонидан таклиф этилаётган пуллик кундалик тизими болаларнинг бепул таълим олиш ҳуқуқига дахл қилмайдими, деган масала мунтазам кун тартибига чиқиб туради.
Изоҳ (0)