Жаҳон банки “Глобал иқтисодий истиқболлар” ҳисоботини эълон қилди. Ҳисоботда Европа ва Марказий Осиё учун тенденциялар, прогнозлар ва хавфлар таҳлил қилинади.
Прогнозларга кўра, Ўзбекистон ялпи ички маҳсулоти ўсиши 2024 йил охирида 6 фоизни ташкил этди.
Келгуси йиллар учун прогноз
Жаҳон банки прогнозида маълум қилинишича, Ўзбекистон иқтисодиёти 2025 йили 5,8 фоиз, 2026 йили эса 5,9 фоиз ўсади. Таъкидлаш лозим, бу – Европа ва Марказий Осиё минтақасидаги давлатлар орасида энг юқори кўрсаткичлардан бири ҳисобланади.
2024 йилнинг октябрь ойида ҳам Ўзбекистон иқтисодиёти 2025 ва 2026 йилларда мос равишда 5,8-5,9 фоиз ўсиши ҳақида маълум қилинганди.
Аввалроқ Ўзбекистонда 2024 йили ялпи ички маҳсулот 6,5 фоизга ошиб, 115 миллиард долларга етгани маълум қилинган.
Марказий Осиё мамлакатлари иқтисодиётига прогноз
Жаҳон банки прогнозларига кўра, Қозоғистон иқтисодиёти 2025 йили 4,7 фоиз, 2026 йили эса 3,5 фоизга ўсади.
Қирғизистон иқтисодиёти эса 2025 ва 2026 йилларда бир хил – 4,5 фоиз ўсиши прогноз қилинган.
Тожикистон иқтисодиёти 2022 йили 8 фоизга, 2023 йили 8,3 ва 2024 йили 8 фоизга ўсган. Прогнозларга кўра, 2025 йили 6 фоиз, 2026 йили эса 5 фоиз ўсиши кутилмоқда.
2024 йилнинг декабрь ойида С&П Глобал Ratings агентлиги Ўзбекистоннинг иқтисодий ўсиши 2025 йилдан 5,5 фоизгача секинлашишини прогноз қилганди.
Изоҳ (0)