Ўзбекистон ташқи ишлар вазири Бахтиёр Саидов бугун Словениянинг Ўзбекистондаги янги элчиси этиб тайинланган Аленка Суҳадолникдан ишонч ёрлиқларини қабул қилди.
Бахтиёр Саидовга кўра, Аленка Суҳадолникнинг мазкур лавозимга тайинланиши Ўзбекистон ва Словения ўртасидаги кўп қиррали икки томонлама муносабатларни янада ривожлантириш ва кенгайтиришга хизмат қилиши кутилмоқда. Мавжуд ҳамкорлик алоқалари бугунги кунда изчил суръатлар билан ривожланиб бормоқда.
Томонлар ўртасидаги ҳамкорликни мустаҳкамлаш борасида катта имкониятлар мавжуд бўлиб, 2025 йилги икки томонлама кун тартиби бой ва истиқболли йўналишларни ўз ичига олади. Хусусан, савдо-иқтисодий, сармоявий, маданий-гуманитар ва бошқа соҳаларда алоқаларни чуқурлаштириш устувор вазифалардан бири сифатида белгиланмоқда.
2024 йил июль ойида Даря Бавдаж Курет Словениянинг Ўзбекистондаги элчиси этиб тайинланган эди. Аленка Суҳадолник 2024-2025 йилларда Словениянинг Тошкентдаги дипломатик миссиясини бошқарган Даря Бавдаж Курет ўрнига тайинланди.
2025 йил 31 январда Бахтиёр Ибрагимов Ўзбекистоннинг Альбаниядаги биринчи элчиси этиб тайинлангани ҳақида хабар берилган эди. Равшан Усмонов эса Ўзбекистоннинг Исландиядаги (қароргоҳи Лондон шаҳрида жойлашган) элчиси этиб тайинланди ва 7 февраль куни Исландия президенти Халла Томасдоттирга ишонч ёрлиқларини топширди. 11 февраль куни Ўзбекистон элчиси Темур Раҳмонов Литва президенти Гитанас Науседага ишонч ёрлиқларини топширди.
Изоҳ (0)