Фаррух Турсунов Ўзбекистоннинг Андоррадаги биринчи элчиси этиб тайинланди. Бу ҳақда “Дунё” ахборот агентлиги хабар берди.
11 март куни у Андорра ҳамраиси, Франция президенти Эммануэл Макронга ишонч ёрлиқларини топширди.
Хабарда айтилишича, тантанали маросимдан сўнг бўлиб ўтган мулоқот чоғида дипломат Франция раҳбарига Ўзбекистон президенти Шавкат Мирзиёев номидан самимий салом ва эзгу тилакларни етказди. Эммануэл Макрон ўз навбатида, Ўзбекистон раҳбарига ўз ҳурмати ва миннатдорчилигини билдириб, икки давлат ўртасидаги муносабатлар алоҳида аҳамият касб этишини таъкидлади.
Франция етакчиси Ўзбекистон билан икки томонлама ҳамкорликни мустаҳкамлаш муҳим вазифа эканини алоҳида таъкидлаб, элчининг профессионал дипломатик маҳорати мамлакатлар ўртасидаги муносабатларни янада ривожлантиришга катта ҳисса қўшишига ишонч билдирди.
“Биз Ўзбекистон билан дўстона алоқаларни мустаҳкамлашга катта аҳамият қаратамиз ва барча соҳаларда ҳамкорликни янада кенгайтиришга тайёрмиз”, деди у.
Ўзбекистон ва Андорра ўртасидаги дипломатик муносабатлар 2009 йил 1 декабрда ўрнатилган.
Фаррух Турсунов Ўзбекистоннинг Испаниядаги элчиси сифати 2023 йил 7 декабрь куни Мадрид шаҳрига ташриф буюрган эди. Дипломат 2024 йил 9 апрелида Ўзбекистон элчиси сифатида Испания Қироли Филипп VI га ишонч ёрлиқларини топширганди.
Фаррух Турсунов Ўзбекистоннинг “БМТ Туризм” ташкилотидаги (аввалги Бутунжаҳон туризм ташкилоти) доимий вакили ҳам ҳисобланади.
Изоҳ (0)