Бугун, 2 октябрь куни Тошкент шаҳрида IV Бутунжаҳон Креатив иқтисодиёт анжумани бўлиб ўтди. Бу ҳақда “Дарё” мухбири хабар берди.
Маданият ва санъатни ривожлантириш жамғармаси томонидан ташкил этилган тадбирда 75 давлатдан санъат, маданият, архитектура, мода ва бошқа ижодий соҳа вакиллари иштирок этди.
Анжуманда креатив иқтисодиёт келажаги, янги технологиялар, хусусан, сунъий интеллектнинг мазкур соҳага таъсири муҳокама қилинди.
Таъкидланишича, дунёда маданий ва ижодий саноат йилига тахминан 2,3 триллион доллар даромад келтиради. Бу глобал ялпи ички маҳсулотнинг қарийб 3,1 фоизига тенг. 2030 йилга бориб мазкур кўрсаткич 10 фоизга ўсиши кутилмоқда.
Тадбирда иштирок этаётган архитектор Тахмина Турдиалиева фикрлари билан бўлишди.
“Ижодкорлар ўз иқтидорини сотади. Бунда харажат кам, лекин даромад яхши бўлади. Чунки иқтидор доим юқори баҳоланади. Ўзбекистон креатив иқтисодиётни иқтидорли ижодкорларни қўллаб-қувватлаш орқали ривожлантирмоқчи. Масалан, мен архитекторман. Фаолиятим қўллаб-қувватланса, лойиҳаларим чет элга экспорт қилинса, шу орқали мамлакатга пул келади ва бу иқтисодиёт ўсишига таъсир қилади. Ижодкорлик иқтисодни ўстиришда энг кам харажатли йўл ҳисобланади. Биз ёш архитекторларга ўзимиз лойиҳа ҳам, унга пул ҳам топа оламиз. Фақат ҳукумат томонидан административ қўллаб-қувватлов керак. Шундагина бу соҳа иқтисодиёт драйверига айланади”, деди мутахассис.
Маданият вазири Озодбек Назарбеков фикрига кўра, Ўзбекистонда ижодий йўналишларда катта молиявий манфаатдорлик ҳали шаклланмаган.
“Оддий мисол, муаллифлар ҳуқуқи тўлиқ ҳимояланмаган. Бундай анжуманлар соҳанинг ҳуқуқий асосларини яратишга турки беради. Креатив иқтисодиёт халқаро даражада йўқолиб бораётган қўл меҳнатини ҳимоя қилиш учун ҳам яхши омил бўлади. Ўзбекистон ҳунармандчилик ривожланган давлат. Биз ижодий маҳсулотларимизни жаҳон бозорларига тақдим қила олишимиз керак”, дейди маданият вазири.
Тадбир 4 октябргача давом этади. Дастур доирасида турли йиғилишлар, панел муҳокамалари, маҳорат дарслари ўтказилади.
Иштирокчилар учун маданий дастур, санъат кўргазмалари ва алоҳида нетворкинг имкониятлари яратилади.
Конференция якунида Ёшлар ишлари агентлиги ҳамда Маданият ва санъатни ривожлантириш жамғармаси ёшлар учун стартап танлови эълон қилиши кўзда тутилган. Мазкур танлов доирасида ёш истеъдодлар ўз лойиҳаларини намоён қилиш имкониятига эга бўлади.
Маълумот учун, 2018 йилда Индонезияда креатив иқтисодиёт бўйича илк анжуман ўтказилган. Мазкур соҳа барқарор ўсишни таъминлаш, ресурсларга боғлиқ иқтисодиётдан билим иқтисодиётига ўтишда креатив соҳалар ролини қўллаб-қувватлашни кўзлайди. Бу борада халқаро ҳамкорликни мустаҳкамлашга ёрдам беради.
Изоҳ (0)