“Ҳатто Зеленский ҳам савол бериши мумкин”: Путин тўғридан тўғри эфир ва катта матбуот анжумани ўтказади

Россия президенти Владимир Путин 14 декабрь куни тўғридан тўғри эфир ва катта матбуот анжумани ўтказади. Бу ҳақда “Коммерсант” хабар берди.

Маълум қилинишича, Путин йил якунларини сарҳисоб қилади. Бу телевизион каналларининг дастури бўлиб, тўғридан тўғри эфир ва президентнинг якуний матбуот анжуманини бирлаштирган форматда бўлади. Бутунроссия халқ фронти ижроия қўмитаси раҳбари Михаил Кузнецовга кўра, “фейк ва рақибларнинг аралашувига қарши курашиш учун жанговар гуруҳ тузилган”. У “бўлаётган воқеага алоқаси йўқ, лекин ваҳима қўзғатадиган” саволларни текширади.

Кузнецовнинг таъкидлашича, Путиннинг ўзи жавоб берадиган саволларни унга тақдим этилган рўйхатдан танлайди. ШОТ маълумотларига кўра, Песков “ҳатто Зеленский ҳам тўғридан тўғри алоқа пайтида Путинга савол бера олади”, деган. У дунёнинг исталган нуқтасидан Путинга савол бериш мумкинлигига ишонтирмоқда. Бироқ Песков саволлар синчковлик билан филтрланишига аниқлик киритмаган.