Болалар нафақаси тайинланган оилада фарзандлар сони ўзгарса, нафақа қайта ҳисобланади — Иқтисодиёт ва молия вазирлиги

Оилада болалар сонининг ўзгариши, уларга тайинланган нафақа миқдорига таъсир қилади. Бу ҳақда Иқтисодиёт ва молия вазирлиги эслатиб ўтди.

Маълум қилинишича, болалар нафақаси тайинланган оилада фарзандлар сони ўзгарган тақдирда нафақа миқдори болаларнинг сонидан келиб чиқиб, кейинги ойдан бошлаб қайта ҳисобланади. Бунда болалар сони ўзгаришига навбатдаги бола туғилиши, 18 ёшгача болалардан бири вафот этиши, бола (болалар) 18 ёшга тўлиши кабилар киради.

Ҳукуматнинг 2021 йил 21-октябрдаги “Аҳолини ижтимоий ҳимоя қилиш тизимини янада такомиллаштириш чора-тадбирлари тўғрисида”ги қарорига асосан, болалар нафақаси ёки моддий ёрдам тўлови ҳар ойнинг 4-санасидан 27-санасига қадар тўланади.

“Ушбу маблағларни тўлаш қонун ҳужжатларида белгиланган тартибда ишончнома асосида ҳам амалга оширилиши мумкин. Бунда маблағнинг учинчи шахсга ишончнома орқали тўланишига йўл қўйилмайди”, — дейилади вазирлик хабарида.

Манбага кўра, жорий йилнинг июль ойида “Ижтимоий ҳимоя ягона реестри” орқали республикадаги кам таъминланган оилаларга 949,4 миллиард сўм ижтимоий нафақа тўлаб берилди.

Аввалроқ Пенсия жамғармаси болалар нафақаси олиш учун ариза ва унга илова қилинган ҳужжатлар яшаш жойидаги фуқароларнинг ўзини ўзи бошқариш органига топширилиши кераклигини маълум қилганди.

Болалар нафақаси ёки моддий ёрдам тайинлашда оиланинг ҳар бир меҳнатга лаёқатли ёшдаги аъзосини расмий даромад манбаларга эгалигини аниқлаштириш талаб қилинади. Белгиланган мезонлар асосида оилани кам таъминланган оила деб эътироф этиш ва унга болалар нафақаси ёки моддий ёрдамни тайинлаш ёхуд тайинлашни рад этиш “Ижтимоий ҳимоя ягона реестри” ахборот тизими орқали автоматлаштирилган тарзда амалга оширилади.

2021 йил 1 сентябрдан бошлаб болалар нафақаси тўловларининг ҳар ойлик миқдори қуйидагича белгиланган:

• 250 000 сўм — 3 ёшдан 18 ёшгача бўлган битта фарзанд учун;

• 325 000 сўм — ёши 3 ёшгача бўлган битта кичик фарзанд учун;

• 150 000 сўм — оиланинг иккинчи фарзанд учун қўшимча;

• 100 000 сўмдан — оиланинг учинчи ва ундан кейинги ҳар бир фарзанди учун.

Эслатиб ўтамиз, ҳозирда Ўзбекистонда 2 миллион 200 минг оилага болалар нафақаси ва моддий ёрдам тўланмоқда.