Россия импортига чекловлар оқибатида рублнинг қулаши, охир-оқибат Россия президенти Владимир Путинни урушни давом эттириш ёки иқтисодиётини сақлаб қолиш ўртасида танлов қилишга мажбурлайди. Бу ҳақда Тhе Washington Post хабар берди.
Нашрга кўра, рублнинг заифлашиши Россия иқтисодиётига босимнинг энг ёрқин белгиларидан биридир. Савдо номутаносиблиги шароитида Россиянинг катта харажатлари натижасида рубль ривожланаётган бозорларда кескин қадрсизланди.
Июль ойи ҳолатига кўра, АҚШда Россияга алоқадор 3600 дан ортиқ жисмоний, юридик шахслар, кема ва самолётларга санкция қўйилган. АҚШ санкциялари қаторида Россиянинг энг йирик 10 та банки, ҳарбий техника ишлаб чиқарувчи компаниялар ва ҳукумат амалдорлари ҳам бор.
Европа Иттифоқи санкциялари сони эса 1800 дан ошди. Россия марказий банкининг хориждаги 300 миллиард долларга яқин активларини блокировка қилиш ва нефть эмбаргоси энг катта ва муҳим санкциялар қаторига киради. Ҳарбий мақсадларда фойдаланиладиган технологияларни экспорт қилишда ҳам чекловлар мавжуд.
Қўшимча санкциялар орасида активларни музлатиш, банк, савдо чекловлари ва Россия жисмоний ҳамда юридик шахсларига нисбатан чекловлар бор.
Россиянинг июль ойида нефть даромадлари 2022 йилга нисбатан 41 фоизга камайди. Жорий ҳисобнинг профицити 2023 йилнинг биринчи етти ойида ўтган йилга нисбатан 140 миллиард доллардан кўпроққа камайди.
АҚШ ва унинг иттифоқчилари санкциялар ва савдо чекловлари учинчи давлатлар орқали четланиб ўтилишини тўхтатмоқчи. Эҳтимолий қадамлардан бири учинчи давлатларга, масалан, Туркия ёки Хитойда жойлашган компанияга санкциялар остидаги россиялик жисмоний ёки юридик шахслар билан бизнес қилгани учун санкция киритишдир.
Шимолий Корея ва Эрон мисолида АҚШ шундай қилди. Россияга келсак, иккиламчи санкциялар АҚШ ва Ҳиндистон каби дўст давлатлар ўртасида зиддиятга олиб келиши ва Хитой билан аллақачон қийин муносабатларни мураккаблаштириши хавфи бор.
Изоҳ (0)