Ўзбекистон маданият вазири ўринбосари Баҳодир Аҳмедов бир гуруҳ санъаткорлар билан ўтказган йиғилишида “Х-фактор” лойиҳасини танқид қилиб ўтганди. Унда кўрсатувнинг савияси, айтилаётган қўшиқлари ва ҳакамлар ҳайъати аъоси Иброҳим Аҳмедовнинг хатти-ҳаракатлари ҳақида сўз борганди.
— Иштирокчи бир пайтлар “зона”нинг ашулалари дейиладиган қўшиқларини ижро этиб ўтирибди, биттаси шляпани кийиб олиб, ура деб қўллаб-қувватлаяпти, — деганди вазир ўринбосари Баҳодир Аҳмедов.
Унинг сўзларини хонанда Шуҳрат Дарё ҳам қўллаб-қувватлаб, бу кўрсатувни кўриб, ўзбек санъати ва миллати учун ачингани ҳақида айтиб ўтганди.
Бу фикрлар ижтимоий тармоқларда кўплаб муҳокамаларга сабаб бўлганидан кейин телеканал ўзининг Instagram профилида бунга муносабат билдириб ўтди.
Биринчидан, “Х-фактор” танлов эмас, аксинча, ҳаваскор ижрочилар ўртасидаги глобал шоу ҳисобланади. Мазкур шоуда қатнашчиларнинг вокал имкониятлари билан бирга уларни саҳнада шоу ярата олиши, ҳакамлар ва томошабинлар эътиборини ўзига қарата олишига ҳам баҳо берилади.
Иккинчидан, “Х-фактор” шоу-формати халқаро формат бўлиб, Ўзбекистонда биринчи марта мазкур лойиҳа ФTV телеканали томонидан Буюк Британиянинг “Фремантле Медиа” компаниясидан харид қилинган лицензия асосида тасвирга олинмоқда. Шоу дунёнинг 56 давлатида қандай шартлар асосида суратга олинган бўлса, Ўзбекистонда ҳам айнан лойиҳанинг умумий ва ягона сценарийси асосида тасвирга олинади.
Учинчидан, юқорида айтиб ўтилганидек, “Х-фактор” шоусининг ягона ва асосий шарти профессионал бўлмаган ҳаваскорлар иштирок этишидир ва бундай қатнашчиларга уларнинг миллати, келиб чиқиши ёки қарашларига асосланган ҳеч қандай чекловлар мавжуд эмас. Эслатиб ўтамиз, “Х-фактор” глобал шоу ва Ўзбекистон кўп миллатли мамлакат, бу шоуда барча миллатга мансуб иштирокчилар эркин қатнашишлари, ўз тилларида ва хорижий тилларда қўшиқ куйлашига ҳеч ким тўсқинлик қилишга ҳаққи йўқ.
Тўртинчидан, “Х-фактор” шоуси қатнашчилари ҳакамлар томонидан “Ҳа” ёки “Йўқ” деган овоз бериши асосида баҳоланади. Маданият вазирлигининг мулозими таъкидлаганидек, иштирокчилар 10 баллик системада баҳоланмайди ва умуман баллар ишлатилмайди. Шунинг учун, вазир ўринбосари , “Х-фактор” шоусининг ҳеч бўлмаганда 1 та эпизодини тўлиқ кўриб чиқиши ва шундан кейин фикр билдиришини тавсия қиламиз.
Бешинчидан, шоунинг иштирокчиларидан бири ҳақида Баҳодир Аҳмедов фикр билдирар экан, “Зонани ашуласини айтиб ўтирибди, ҳакам бўлса уни олқишламоқда”, — деди. Ваҳоланки, иштирокчининг рэпертуаридаги қўшиқларга эътибор берадиган бўлсангиз, у ерда: “Ўзбекистон гулзор”, “Истасанг, бу фалакдан ойни олиб бераман” ва бир нечта хориж эстрадаси қўшиқларига пародия қилиб куйланган. Вазир ўринбосари эса шансон билан ўзи айтаётган йўналишни фарқлай олмайдими?!
Олтинчидан, Баҳодир Аҳмедов ҳакамлар ҳақида гапириб, “Шляпада ўтирвоган ўзича, ор-номуси йўқ, ўзи жонли айта оладими, қўшиқ айта оладими, баҳо бериб ўтирибди, ўла”, — деган сўзларни ишлатиб, шоу ҳакамлари, ижодкорлари ва барча тасвирга олиш жамоасининг шахсиятига тегадиган гапларни ҳам айтган.
Вазир ўринбосарига ФTV телеканали эслатиб ўтмоқчики, Ўзбекистон Республикасининг амалдаги қонунчилигига асосан шахсларнинг шахсияти, ор-номуси ва обрўсига путур етказиш, ҳақоратлашга йўл қўйилмайди.
ФTV телеканали жамоаси юқоридаги вазир ўринбосари томонидан билдирилган фикрларни ўринсиз, бутун телеканал жамоаси ва лойиҳа иштирокчиларига ҳурматсизлик деб ҳисоблайди, — дейилади хабарда.
Изоҳ (0)