“Артист” телелойиҳасидаги иштироки билан тингловчиларга яхши таниш бўлган ёш хонанда Элёр Мелибоев илк яккахон концерт дастурини тақдим этишга тайёргарлик кўрмоқда. Аслида хонанда катта саҳнадаги ижодини бошлаганига кўп бўлгани йўқ. Катта тажрибага эга бўлган 22 ёшли хонанданинг катта саройда концерт бериши осон эмас. Хўш, Элёр Мелибоевнинг концерт беришини кўпроқ ким истади?
— Концерт беришнинг масъулияти оғир экан. Бир кун бўлса ҳам катта тайёргарликни талаб этади. Томошабинлар олдида қўшиқ куйлаш қийин эмас, чунки яқинда Наманганда бўлган концерт дастурида 70-80 мингта томошабин олдида қўшиқ куйлашимга тўғри келди. Аммо яккахон концерт дастурининг масъулияти ўзгача бўларкан.
Концерт беришни кўпроқ ўзим хоҳладим. Фарғона санъат саройида концерт бераман, деганимда негадир худди кўнглим сезгандек аввал Тошкентда, кейин вилоятлар бўйлаб концерт бераман деб хаёлдан ўтказдим. Бир неча кундан кейин пойтахтдаги концерт ташкилотчилари таклиф билан чиқишди, — дейди ёш хонанда.
Элёр Мелибоев нега тўлиқ жонли ижрода концерт беришга аҳд қилганини қуйидагича изоҳлади.
— Халқимизни алдамаслик керак. Тўққиз йилдан буён санъат соҳасида таҳсил оляпман. Имконият бўлса, фақат жонли ижрода куйлаш керак. Фонограммадан фойдаланадиган хонандалардан узр сўрайман, аммо мен ҳалол меҳнат тарафдориман. Агар концерт фақат фонограмма орқали ўтказиладиган бўлса, томошабин уйда дискдаги қўшиқни эшитиб ўтиргани ҳам маъқул, — дейди Элёр Мелибоев.
Ёш хонанда концертдаги кутилмаган ҳолатларга қанчалик тайёр экани ҳақида ҳам гапирди.
— Кутилмаган ҳолатлар ҳамиша омад келтиради. “Артист” лойиҳасида иштирок этаётганимда “Ялала бобо” қўшиғини ижро этишимни айтганимда кўрсатув продюсери рад этганди. Чунки бошқа иштирокчилар жаҳон классикаларининг сараларини ижро этишаётганди. Хуллас, бошқа қўшиққа тайёргарлик кўриб, саҳнага чиқдим. Аммо ҳаяжонданми гитарамнинг овози кутилганидек чиқмади. Овоз режиссёри сенсираб, қўпол муомала қилди. Унинг гаплари қаттиқ таъсир қилиб, “Бўлди кўрсатувда иштирок этмайман”, деб турганимда ҳакамлар ҳайъатидагилар кейинги иштирокчи билан навбат алмашишимни тавсия қилишди. Ўша пайтда ҳаммасига қўл силтаб кетишга тайёр эдим. Кейин бир оз ўтириб, “Барибир кетаман-ку, ўзим билмайдиган қўшиқни эмас, биладиганимни айтаман”, дедим. Шартга кўра, икки ярим дақиқа қўшиқ кулашимиз керак эди. Мен танлаган “Ялала бобо” қўшиғининг давомийлиги эса бор-йўғи 45 сония эди. Хуллас, қўшиқ бошланганидан кейин ҳакамлар ҳайъатининг ҳам мухлисларнинг ҳам эмоцияси ўзгарди. Ўшанда хаёлимга келган учта қўшиқни бирин-кетин ижро этдим. Чунки мухлисларнинг олқиши менга куч бағишлаётганди, — дейди ёш хонанда Элёр Мелибоев.
Агар ёш хонанда илк яккахон концерт дастурига қандай тайёргарлик кўраётганини билишга қизиқсангиз, махсус репортажни томоша қилинг.
Изоҳ (0)