Андижонда ўқувчилар чиқиндилардан қилинган креатив образларда мода намойиши ўтказди (фото)

Андижон шаҳрида ўқувчилар чиқиндилардан яратилган креатив образларда мода намойиши ўтказди, деб хабар бермоқда Экология вазирлиги ахборот хизмати. 

Хабар берилишича, Андижон шаҳридаги Президент мактабида навбатдаги “Эко-фест” тадбири ўтказилди. Тадбирда 4 та жамоа (“Bluye”, “Greyen”, “Red”, “White”) ўзаро беллашди. Хусусан, “Экология ҳар биримиздан бошланади” шиори остида расмлар танлови бўлиб ўтди. Шунингдек, иштирокчилар томонидан чиқиндилардан қайта ишланган буюмлар ва ҳунармандчилик маҳсулотлари, креатив ва замонавий чиқинди қутилари тақдим этилди. Қолаверса, эко нотиқлар ва эко тарғиботчилар танлови ҳамда “эко-фашион” шоу намойиши ҳам бўлиб ўтди. “Эко-фашион” шоуда ўқувчилар чиқиндилардан яратилган креатив образларда намоён бўлишди.

Маълумот учун, “Эко-фест” лойиҳаси икки йилдан буён мунтазам ўтказилмоқда. Лойиҳа халқаро экспертларнинг маърузалари, инсоннинг табиатга таъсири тўғрисидаги амалий семинарлар, мустақил тадқиқотлар, маиший ва иссиқхона шароитларида “ақлли суғориш” орқали сувни тежаш бўйича смарт-ечимларни ишлаб чиқиш, қоғоз ва пластикни қайта ишлаш бўйича маҳорат сабоқлари, сув тозалаш объекти, ҳавони мониторинг қилиш станцияси, чиқинди полигонига экскурсиялар ва бошқа тадбирларни ўз ичига олади. 

Тадбирда чиқиндилардан қайта ишланган буюмлар ва ҳунармандчилик маҳсулотлари савдоси ташкил қилинди. Савдодан тушган маблағ мактабда ўтказилиши белгиланган “Яшил макон” акцияси учун сарфланади.  

Шунингдек, жамоалар эко-нотиқлар беллашувида табиатга зарар етказувчи ҳаракатларга нисбатан муросасиз муносабатни таъсирчан усулларда тарғиб қилди.  Тадбир якунида лойиҳа давомида ғолиб бўлган ўқувчилар, жамоалар диплом ва ташаккурномалар билан тақдирланди.