Энергетика вазирлигида қуёш панеллари бўйича мурожаатларни қабул қилиш учун мўлжалланган телефон рақамлари сони оширилди. Бу ҳақда вазирлик ахборот хизмати хабар бермоқда.
Энергетика вазири Жўрабек Мирзамаҳмудов “Лолазор” подкастида қуёш панелларини ўрнатиш бўйича ноқонуний ҳаракатлар кузатилса, ўз қабулхонасига (71-231-14-41 рақамига) қўнғироқ қилишларини айтган эди.
Шундан сўнг тармоқларда энергетика вазири қабулхонасига қўнғироқ қилиб, боғлана олмаганлик ҳолатлари бўйича эътироз кўпайган. Вазирлик ахборот хизматининг маълум қилишича, 7 октябрь куннинг иккинчи қисмидан бошлаб, 8 октябрь соат 20:30 га қадар вазирлик қабулхонасига жами 1232 та қўнғироқ бўлган. Уларнинг 131 тасига қабул қилиниб, жавоб берилган. Қабул қилинган қўнғироқларнинг:
- 54 таси қуёш панелларининг афзалликлари, уни ўрнатишга давлат томонидан қандай имтиёзлар берилиши;
- 28 та қўнғироқ эгаси маҳалласидаги электр таянч устуни ҳамда электр узатиш ҳаво тармоғининг эскилигини айтиб, янгилашда ёрдам сўраган;
- 31 та қўнғироқ қуёш панели ўрнатишга мажбурланаётганини айтган фуқаролардан тушган бўлиб, уларнинг 14 таси бу ҳодиса бир неча кун аввал бўлганини билдирган;
- 18 та қўнғироқнинг 6 таси вазирлик қабулхонаси рақами ҳақиқатан ҳам ишлаяптими ёки йўқми, эканини билиш учун қилинган;
- 4 та қўнғироқ эгаси вазирликка ишга жойлашиш имконияти билан қизиққан;
- 8 та қўнғироқ эгаси Энергетика вазирига раҳмат айтиш учун телефон қилганликларини билдиришган.
Фақат 17 та қўнғироқ эгасигина бугунги кунда бу борада ҳақиқий муаммога эга эканлигини маълум қилган. Вазирлик ходимлари уларнинг мурожаатларини ўрганиб, қуёш панели ўрнатмагани учун электр энергиясидан узиб қўйилган тадбиркорларнинг электр энергиясини улатиб берган.
Икки кун мобайнида Тошкент шаҳрининг Сергели, Яшнобод, Юнусобод ҳамда Бектемир туманлари, Сирдарё вилоятининг Боёвут, Сурхондарё вилоятининг Бандихон, Фарғона вилоятининг Бувайда, Тошкент вилоятининг Қуйи Чирчиқ туманларидаги бир қатор тадбиркорлар электр энергиясига қайта уланган.
Билдирилишича, мавжуд вазиятдан келиб чиқиб, 9 октябрдан бошлаб мурожаатлар нафақат бу рақам орқали, балки 71-231-16-61 (ички 7046, 7037 ва 7057) рақамлари орқали ҳам қабул қилинади.
Изоҳ (0)