Расмий Сеул Ўзбекистоннинг ЖСТга аъзо бўлишини тўлиқ қўллаб-қувватлаган ҳолда, халқаро майдонда ташкилотга аъзо бошқа мамлакатларни ҳам Ўзбекистон номзодини тасдиқлашга чорлайди. Бу ҳақда Корея Республикаси савдо, саноат ва энергетика вазири Ан Док Кин “Менимча” кўрсатувига берган интервьюсида айтиб ўтди.
Корея Республикаси президенти Юн Сок Ёлнинг Ўзбекистонга ташрифи доирасида икки мамлакат ўртасида “Жаҳон савдо ташкилоти доирасида ҳамкорлик тўғрисида” баённома имзоланган эди. Бу эса Корея томони Ўзбекистоннинг ушбу ташкилотга аъзолигини қўллаб-қувватлашини англатади.
Ўзбекистон айни пайтда ЖСТга аъзо бўлиш ҳаракатида. Корея Республикаси эса бугунги кунда ушбу ташкилот кенгашига раислик қилмоқда. Шуни айтишим керакки, расмий Сеул Ўзбекистоннинг ЖСТга аъзо бўлишини тўлиқ қўллаб-қувватлаган ҳолда, халқаро майдонда ташкилотга аъзо бошқа мамлакатларни ҳам Ўзбекистон номзодини тасдиқлашга чорлайди.
Ўзбекистоннинг ушбу нуфузли ташкилотга аъзо бўлиши иқтисодий ўсиш суратларининг ошишига хизмат қилади. Жанубий Корея иқтисодий тараққий этишида ЖСТга аъзо бўлиши яхши туртки берган. Ишонамизки, Ўзбекистон тараққиёти ҳам худди бизнинг мамлакатдагидек давом этади. Бунинг учун Корея томони ўз тажрибасини ўртоқлашиш ва бор имкониятларини ишга солишга тайёр, — деди жаноб Ан Док Кин.
У Ўзбекистон президенти иқтисодий ислоҳотлар сиёсатини тўғри йўналишда амалга ошираётганини алоҳида урғулаб, мамлакатнинг иқтисодий ташаббусларни келгусида ҳам қўллаб-қувватлашга тайёр эканлигини айтиб ўтди.
Маълумот учун, Ўзбекистоннинг ЖСТга аъзо бўлиши бўйича ишчи гуруҳ 1998 йилда ташкил этилган эди. Кейинги йилларда ушбу ишчи гуруҳ фақат уч марта учрашди ва 2005 йилларнинг ўрталарига келиб бу борада халқаро экспертлар билан учрашувлар тўхтаб қолганди.
Ўзбекистоннинг ЖСТга аъзо бўлиш жараёни 2020 йил июль ойида бўлиб ўтган ишчи гуруҳнинг тўртинчи йиғилиши билан расман қайта тикланди. Шундан сўнг 2022 йил июнь, 2023 йил март ва 2023 йил ноябрь ойларида яна учта учрашув бўлиб ўтди.
2023 йил сентябрида Шавкат Мирзиёев БМТ Бош ассамблеясининг 78-сессияси доирасида Жаҳон савдо ташкилоти (ЖСТ) бош директори Нгози Оконжо-Ивеала билан учрашув ўтказганди. Унда ЖСТ бош директори Ўзбекистон томонидан ташкилотга аъзо бўлиш борасида кўрилаётган чораларни юқори баҳолаган. Нгози Оконжо-Ивеала ЖСТ котибияти Ўзбекистоннинг саъй-ҳаракатларини тўлиқ қўллаб-қувватлашини айтган ҳамда мамлакат яқин келажакда ташкилотга қўшилишига ишонч билдирганди.
Изоҳ (0)