Ижтимоий тармоқларда автомобилларга газ қуйиш шохобчаларида кунлик лимит қўйилгани ҳақида хабарлар тарқалди. Энергетика вазирлиги бунга муносабат билдирди.
Қайд этилишича, табиий газ баланси Вазирлар Маҳкамасининг 2018 йил 12 январда “Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида”ги қарори билан тасдиқланган “Табиий газдан фойдаланиш қоидалари”га мувофиқ ишлаб чиқилади ва шу асосда ресурслар ҳамда тақсимот баланси шакллантирилади.
Бугунги кунда “Ҳудудгазтаъминот” АЖнинг ҳудудий филиаллари томонидан 1 173 та АГТКШга 2023 йилнинг 8 ойида 2,5 миллиард куб метр табиий газ етказиб берилган. Бу миқдор ўтган йилнинг мос давридагига нисбатан 106 миллион куб метр кўпдир.
“Бундан ташқари, табиий газ етказиб беришда газ қувурларининг гидравлик ўтказувчанлигидан келиб чиққан ҳолда ҳисоб-китоб асосида соатлик, кунлик, ойлик ва йиллик газ ҳажмлар белгиланади. Мазкур белгиланган газ ҳажмлари эса истеъмолчилар билан тузиладиган шартномаларда кўрсатиб ўтилган бўлиб, истеъмолчиларнинг буюртмаси асосида шакллантирилади”, — дейилади вазирлик изоҳида.
Маълум қилинишича, истеъмолчилар қўшимча газ ҳажми хариди юзасидан Вазирлар Маҳкамасининг 22-сонли қарорида кўрсатилган тартиб бўйича мурожаат қилиши мумкин. Бунда газ таъминоти ташкилотлари табиий газ ресурслари ва газни тақсимлашнинг тасдиқланган балансига мувофиқ ажратилган ҳажмлардан келиб чиқиб, буюртмаларни қайта кўриб чиқишга ҳақли.
Бундан аввал метан заправкаларга газ етказиб бериш чеклангани ҳақида хабарлар тарқалганди. Энергетика вазирлиги буни рад этиб, барча метан заправкаларга уларнинг талабларига асосан белгиланган лимитга кўра, табиий газ тўлиқ етказиб берилганини билдирганди.
Изоҳ (0)