Ўзбекистон Молия вазири энергетика тизимида коррупция ва иш тизимидаги камчиликлар энергия ресурслари тарифларига қай даражада таъсир ўтказаётгани ҳақида изоҳ берди. Бу ҳақда 1 август куни энергоресурслар нархининг ошишига бағишланган матбуот анжуманида айтиб ўтилди, дея хабар бермоқда «Дарё» мухбири Мусулмонбек Иброҳимов.
Анжуманда журналист шу пайтгача энергетика тармоғида йўқотилган пуллар — коррупция, нотўғри тизим 15 августдан бошлаб энергия ресурслари тарифларига янги нархлар жорий этилишига қай даржада таъсир қилди, деган савол берди. Бунга Молия вазири Жамшид Қўчқоров қуйидагича жавоб берди:
«Менимча, таъсири бор бўлган бўлиши керак. Чунки электр энергиянининг 20 фоизи йўқотилаётган бўлса, унга пропорционал равишда фойда йўқотилмоқда. Демак, бунинг нархини қоплашдаги захира, деб атасак бўлади. Яъни агар шу йўқотиш бўлмаганда, мисол учун, нархни камроқ оширса бўлар эди, деб айтилмоқда. Бу мантиқан 100 фоиз тўғри. Лекин табиий йўқотишлар ҳам бор. Чунки электр энергия симда юрганда йўқолади. Табиий йўқотишлар дунёда 6-5 фоиз дейилмоқда, бизда эса 20 фоиз. Ҳозирги тарифлар барибир ҳам инвестиция харажатларини қоплайдиган даражада эмас. Бу соҳада, биринчи коррупцияни, иккинчиси бемазагарчиликни яъни ишлашни билмаслик йўқотилмас экан чиқимлар одамлар ҳисобига ёпилган бўлади», — деди вазир.
Журналист тизимдаги камчиликлар учун халқ қийналмоқдами, дея саволни давом эттирди. Бунга Молия вазири «Маълум маънода шундай деса бўлади», —дея жавоб берди.
Маълумот учун, Вазирлар Маҳкамасининг 30 июлдаги «Ёқилғи-энергетика ресурсларининг нарх ва тарифларини ўзгартириш тўғрисида»ги қарорига кўра 15 августдан Ўзбекистонда табиий ва суюлтирилган газ, шунингдек, электр энергияси учун тарифлар оширилади.
Қарорга биноан, ҳисоблагичлар мавжуд бўлганда аҳолига сотиладиган бир кубометр табиий газнинг нархи 380 сўмни ташкил этади (ҳозирда — 320 сўм, ўсиш — 18,7 фоиз). Ҳисоблагич йўқ бўлганда, пишириш ва сувни иситиш учун ишлатилган газнинг нархи 660 сўм бўлади (ҳозирда — 553 сўм, ўсиш — 19,3 фоиз), иситиш тизими учун эса — 380 сўм (ҳозирда — 320 сўм, +18,7 фоиз).
Аҳоли учун бериладиган суюлтирилган газнинг килограмми 1120 сўмни ташкил этади. Ҳозирда унинг нархи 950 сўм бўлиб, ўсиш 17,8 фоизга тенг.
Турар жой истеъмолчилари учун 1 кВт/соат электр энергияси 250 сўмдан 295 сўмга ошади. Бошқа категориядаги истеъмолчилар учун эса тариф қиймати 450 сўмга тенг.
Изоҳ (0)