Бугун, 24-октябрь куни Сенатнинг эллик тўққизинчи ялпи мажлисида “Ўзбекистон Республикасининг Жиноят-процессуал кодексига қўшимча ва ўзгартиришлар киритиш тўғрисида”ги қонун муҳокамаси бўлиб ўтди. Бу ҳақда Сенат ахборот хизмати хабар бермоқда.
Қонунда озодликдан маҳрум этилган шахсларни улар жазо ўташини давом эттириш учун, шунингдек, руҳий касалликка чалинган шахсларни мажбурий даволаш учун бериш ва қабул қилиш асослари, шартлари ҳамда рад этиш тўғрисидаги қоидаларни киритиш назарда тутилган.
Қонун хорижий давлатлар судлари қарорларини тан олиш ва ижрога қаратиш тартиби, шахсларни ўтказиш билан боғлиқ харажатлар ва бошқа масалаларга доир қоидаларни қамраб олган.
Унда маҳкумларни жазони ўташни давом эттириш ёхуд руҳий касалликка чалинган шахсларни мажбурий даволаш учун Ўзбекистонга қабул қилиш тўғрисидаги мурожаатларни кўриб чиқиш тартиби ҳам аниқ белгиланмоқда.
Муҳокама давомида қонун маҳкумни унга белгиланган жазони ўз давлатида ўташи орқали уни ижтимоий реабилитация қилишни жадаллаштиришга, шунингдек, хориждаги фуқароларнинг ҳуқуқий ҳимоя қилинишига хизмат қилиши таъкидланди.
Қонун сенаторлар томонидан маъқулланди.
Изоҳ (0)