Прокурор суддан Тошкент вилояти бош инфекционисти Гулжаҳон Йўлдошевани 5 йилга озодликдан чеклашни сўради

Тошкент вилояти бош инфекционисти Гулжаҳон Йўлдошева ҳамда бошқа мансабдор шахсларга нисбатан навбатдаги суд мажлиси 4 март куни бўлиб ўтди. Унда давлат айбловчилари Ниғмонов ва Қурбонбоев сўзга чиқиб, музокаралар якуни бўйича суддан айбланувчиларни маълум моддаларда айбли деб топиб, жазо тайинлашни сўраган. Бу ҳақда Йўлдошеванинг адвокати Хушнуд Ахроровга асосланиб «Gazeta.uz» маълум қилди.

Таъкидланишича, давлат айбловчиси Ниғмонов айбланувчига жазо қўллашда унинг қарамоғида вояга етмаган фарзандлари борлигини инобатга олишни сўраган.

«Давлат айбловчиси судга раислик этувчидан Гулжаҳон Йўлдошевага Жиноят кодексининг 207-моддаси 3-қисми «а» банди (мансабга совуққонлик билан қараш одам ўлишига сабаб бўлиши), 209-моддаси 2-қисми «а» банди (такроран содир этилган мансаб сохтакорлиги) ва 167-моддаси 3-қисми «а» бандида кўрсатилган (жуда кўп миқдордаги маблағни ўзлаштириш ёки растрата йўли билан талон-торож қилиш) жиноятларни содир этганликда айбли деб топиб, узил-кесил 3 йил муддатга муайян ҳуқуқдан маҳрум қилиш ва 5 йил муддатга озодликни чеклаш жазосини тайинлашни сўради», – дея унинг сўзларини келтирмоқда адвокат Хушнуд Ахроров.

Ўз навбатида Йўлдошеванинг ҳимоячилари Ахроров ва Маҳмудов ҳам «айбловга нисбатан ўзининг асосли эътирозини билдирган».

«Ҳар битта эпизодни битталаб, ҳаммаси асоссиз эканини исботлаб бердик. Тергов томонидан тақдим қилинган ҳужжатлар, олинган ашёвий далиллар ва қон таҳлили китоби сохталаштирилганини, жиноят ишига киритилиши тўғрисида баённомалар қалбакилаштирилганининг ўзи терговчи томонидан ‘мансаб сохтакорлиги’ деб уюштирилгани, ёлғон гувоҳларга таянилганини ҳам исботладик», — деди Ахроров.

Адвокатлар Гулжаҳон Йўлдошевага нисбатан сунъий равишда жиноят иши қўзғатилгани ҳамда бунда Тошкент вилоят Соғлиқни сақлаш бошқармаси бошлиғи (Тўрақул Орзиқулов) ва Чирчиқ шаҳар прокурори (собиқ прокурори Бахтиёр Иброҳимов) ташаббус кўрсатганини таъкидлади.

Навбатдаги суд мажлиси 15 март кунига белгиланган.

Унинг қамоққа олиниши жамоатчилик ўртасида кенг муҳокамаларга сабаб бўлди. Бир қатор давлат ва нодавлат ташкилотларнинг раҳбарлари, хусусан, Сенат раиси Танзила Норбоева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева мазкур ҳодисага муносабат билдириб, прокуратурани шифокорга нисбатан қўлланилган эҳтиёт чорасини ўзгартиришга чақирган. Шундан сўнг Гулжаҳон Йўлдошева 6 октябрь куни уй қамоғига ўтказилганди.

Гулжаҳон Йўлдошева ва бошқаларга нисбатан суд жараёнлари 27 ноябрь куни бошланган.