Фан ва инновацион ривожланиш масалаларини тартибга солувчи қонунчилик бўйича тажриба алмашишни йўлга қўйишда Парламентлараро иттифоқ мувофиқлаштирувчи вазифасини бажариши керак. Бу ҳақда сенат раиси Танзила Норбоева Женева шаҳрида бўлиб ўтган Парламентлараро иттифоқнинг 149-ассамблеясида айтиб ўтган.
Сенат раиси бошчилигидаги Ўзбекистон делегацияси Парламентлараро иттифоқнинг 149-ассамблеяси доирасида ташкил этилган “Тинч ва барқарор келажак учун фан, технология ва инновациялардан фойдаланиш” мавзусидаги дебатда иштирок этган.
Сенат раисининг таъкидлашича, парламентларнинг саъй-ҳаракатларини бирлаштиришда унинг имкониятлари ва нуфузидан унумли фойдаланиш мақсадга мувофиқ.
Хусусан, таълим, фан ва инновацион ривожланиш масалаларини тартибга солувчи қонунчилик бўйича тажриба алмашишни йўлга қўйишда Парламентлараро иттифоқ мувофиқлаштирувчи вазифасини бажариши керак.
Айниқса, бюджетни шакллантириш жараёнида фан ва инновацион ривожланишга жалб этиладиган сармояни кўпайтиришга алоҳида эътибор қаратиш лозим. Парламентлар ушбу йўналишда бюджет харажатларини кўпайтиришга кўмаклашишлари зарур, деди Норбоева хоним.
Унинг алоҳида таъкидлашича, парламентлараро иттифоқ доирасида парламентларнинг кадрлар салоҳиятини ошириш ва ривожлантириш бўйича тажриба алмашишни йўлга қўйиш лозим.
Ассамблея иши доирасида Танзила Норбоева Парламентлараро иттифоқ раиси Тулия Эксон ҳамда иттифоқ бош котиби Мартин Чунгонг билан учрашган.
Изоҳ (0)