Ўзбекистонда қасддан баданга енгил шикаст етказганлар энди жиноий эмас, маъмурий жавобгарликка тортилади.
7 октябрь куни имзоланган қонун билан Жиноят ҳамда Маъмурий жавобгарлик тўғрисидаги кодексларга ўзгартириш ва қўшимчалар киритилди.
Унга кўра, кодексларга соғлиқнинг қисқа муддатга ёмонлашувига ёки меҳнат қобилиятининг унча узоқ бўлмаган муддатга йўқолишига олиб келмаган қасддан баданга енгил шикаст етказиш билан боғлиқ жиноий қилмишни жиноий жазо таркибидан чиқариб, уни маъмурий ҳуқуқбузарлик тоифасига ўтказишни назарда тутувчи ўзгартириш ва қўшимчалар киритилмоқда.
Шунингдек, мазкур ҳуқуқий нормани янги тавсифий белгилар билан тўлдириш, ярашув институтига кирувчи маъмурий ҳуқуқбузарликлар доирасини кенгайтириш белгиланмоқда.
Маъмурий жавобгарлик тўғрисидаги кодексга киритилган қўшимчага кўра, ушбу ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса:
- БҲМнинг 5 бараваридан 25 бараваригача (1 миллион 875 минг сўмдан 9 миллион 375 минг сўмгача) миқдорда жарима солишга;
- 15 суткагача муддатга маъмурий қамоққа олишга сабаб бўлиши белгиланмоқда.
Қонун расмий эълон қилинган кундан эътиборан кучга кирди.
Ўзбекистонда соғлиқнинг қисқа муддатга ёмонлашувига олиб келмаган қасддан баданга енгил шикаст етказиш декриминализация қилиниши кўзда тутилган қонун Сенат томонидан 2024 йилнинг июлида маъқулланганди. Депутатлар ушбу қонун лойиҳасини 2024 йилнинг май ойида учинчи ўқишда кўриб чиқиб, қабул қилганди.
Изоҳ (0)