Олий Мажлис Қонунчилик палатаси кенгашида Вазирлар Маҳкамаси томонидан қонунчилик ташаббуси ҳуқуқи асосида киритилган ногиронлиги бўлган шахсларнинг ҳуқуқ ва эркинликларини янада мустаҳкамлаш, уларнинг пенсия таъминотини такомиллаштиришга оид қонун лойиҳаси кўриб чиқиш учун қабул қилинди. Бу ҳақда парламент қуйи палатаси матбуот хизмати хабар берди.
Қайд этилишича, мазкур қонун лойиҳасига асосан “Ижара тўғрисида”ги қонунга киритилаётган ўзгартишлар ногиронлиги бўлган шахсларни камситишнинг олдини олишга қаратилгани билан эътиборли Амалдаги нормаларга кўра, ижара муносабатида иштирок этган шахс, яъни иштирокчи ногирон бўлиб қолганда ижара шартнома муддати тўхтатилар эди. Ҳозирда бу нормани чиқариш таклиф этилмоқда. Бу эса ногиронлиги бўлган шахсларнинг ижтимоий муносабатларда иштирок этишида камситишларнинг олдини олади.
Шунингдек, “Фуқароларнинг давлат пенсия таъминоти тўғрисида”ги қонунга ҳам ўзгартишлар киритилмоқда.
Унга кўра, озодликдан маҳрум этилган шахсларнинг жазони ижро этиш муассасаларида жазони ўташ даврида бажарадиган ҳар қандай иши, агар ушбу иш бажарилган давр учун жазони ижро этиш муассасаси томонидан ижтимоий солиқ тўланган бўлса иш стажига қўшиб ҳисобланадиган меҳнат фаолияти турларига киритилади.
Бу ўзгартиш билан озодликдан маҳрум этилган шахсларнинг ижтимоий ҳимояси янада кучайтирилади.
Мазкур қонун лойиҳасига масъул бўлган Меҳнат ва ижтимоий масалалар қўмитасига қонун лойиҳаси юзасидан сиёсий партияларнинг фракциялари хулосаларини олиш ҳамда уни биринчи ўқишда кўриб чиқиш учун киритиш вазифаси юклатилган.
Аввалроқ ўзбекистонлик депутатлар жиноятлар сони ортгани сабаб шартли озод қилиш тизимини қайта кўриб чиқишни таклиф этгани тўғрисида хабар берилганди. Сенат эса март бошларида бу борадаги тегишли қонунни маъқуллаганди.
Маълумот учун, 2022 йил ноябрь ҳолатига кўра, Ўзбекистон қамоқхоналарида 26 мингдан зиёд маҳкум сақланмоқда. Шунингдек, Ўзбекистонда энди маҳкумларнинг жазони ўташ даврида бажарадиган иши пенсия тайинлашда иш стажига қўшилиши маълум қилинганди.
Изоҳ (0)