Ўзбекистон суверенитети ва манфаатларига зид фикр билдираётган айрим рус сиёсатчилари эскича дунёқарашга эга. Бу ҳақда депутат Бобур Бекмуродов “Дарё” мухбири билан суҳбатда айтиб ўтди.
Тошкент шаҳрида “Халқаро ҳамкорлик ташаббуслари ҳафталиги” доирасида турли соҳаларга оид мулоқотлар бўлиб ўтмоқда. Бугун, 24 октябрь куни ташкил этилган суҳбат Ўзбекистонда эркин фуқаролик жамиятини ривожлантириш мавзусида кечди. Тадбир якунида Олий Мажлис депутати, “Юксалиш” ҳаракати раиси Бобур Бекмуродов “Дарё” мухбирига интервью берди.
Савол: Охирги йилларда баъзи рус сиёсатчилари Ўзбекистон суверенитети ва манфаатларига зид фикрлар билдирмоқда. Парламент ва жамоатчилик бундай чиқишларга жавоб қайтаришда нималарга эътибор қаратиши зарур?
Бобур Бекмуродовнинг айтишича, вазиятга баҳо беришда икки муҳим жиҳатни инобатга олиш керак.
“Биринчидан, бундай гапларни айтаётган одамлар Россияда жамоатчилик фикрини шакллантирмайди. Масалан, Миронов шу тоифадан. Буни яхши тушуниб олишимиз керак. Ўзбекистон жамоатчилиги таҳдидларга нисбатан фаол жавоб бермоқда. Суверенитетга қатъий турибди. Биз одамларимиз манфаатларига зид бўлган ҳар қанақа тажовузли гапга қарши туряпмиз. Бундан кейин ҳам қарши турамиз”, деди депутат.
Бобур Бекмуродов масалага баҳо беришда иккинчи жиҳат давлатлараро муносабатлар эканини таъкидлади.
“Россия билан Ўзбекистон ўртасидаги иқтисодий муносабатлар, парламентлараро ҳамкорлик кенгайиб бормоқда. Бу ҳамкорликдан икки мамлакат ҳам ютяпти. Эски дунёқарашдаги, ҳатто жамоатчилик фикрини шакллантирмайдиган айрим рус сиёсатчилари ўзини катта оғадек тутаётганини кўряпмиз. Бу эскича дунёқараш. Агар Россиянинг ёш, прогрессив депутатлари билан гаплашсангиз, уларда бундай фикрлар йўқ. Шунинг учун эски дунёқарашдаги рус сиёсатчилари ҳамда Ўзбекистон ва Россия ўртасидаги муносабатларни айри ҳолда кўриш керак”, дея фикр билдирди “Юксалиш” ҳаракати раҳбари.
Хулоса қилар экан, Бобур Бекмуродов суверенитет ва манфаатларга қарши ҳар қанақа фикрларга нисбатан Ўзбекистон жамоатчилиги қатъий туриши зарурлигини айтди.
“Қандайдир бир оддий тарихчи гапирса ҳам унга жавоб қилиняпти. Доим айтаманки, жавоблар мутаносиб бўлиши керак. Россияда қайсидир фракция раҳбари фикр билдирдими, биздан ҳам фракция раҳбари жавоб бериши лозим. Оддий ўқитувчининг гапига катта сиёсатчилар жавоб қайтариши шарт эмас. Биз катта давлатмиз, аҳолимиз қарийб 40 миллионга яқинлашди. Ўзбекистон буюк тарихга эга. Шунинг учун ўз даражамизни тўғри белгилаб олишимиз керак”, деди мутахассис.
Рус сиёсатчилари таҳдидлари
Сўнги вақтларда айрим рус сиёсатчилари томонидан Марказий Осиё давлатлари, хусусан Ўзбекистонга нисбатан кескин фикрлар янграмоқда. Бунга нисбатан парламент ва жамоатчилик фаол муносабат билдиряпти. Масалан, 2024 йил 19 октябрь куни россиялик депутат Сергей Миронов Ўзбекистоннинг Қозон шаҳридаги Бош консуллиги фуқароларни Россия армиясида хизмат қилмасликка чақирганидан сўнг, Ўзбекистон билан виза режимини жорий қилиш кераклигини айтганди. Рус депутати фикрларига нисбатан Ўзбекистон жамоатчилиги фаол муносабат билдирди.
Жорий йил сентябрда Тошкент шаҳрида жойлашган мактабнинг рус тили дарсида ўқитувчи 6-синф ўқувчисини ургани акс этган видео тарқалганди. Ҳолатга Россия Ташқи ишлар вазирлиги расмий вакили Мария Захарова Ўзбекистондан бу ҳолатга ҳуқуқий баҳо беришни ва болага нисбатан шафқатсизлик қилган айбдорга қарши чоралар кўришни сўраган.
“Бизнинг ички ишларимиз ҳақида бош қотиргунча муаммоларга тўла ўзларининг ишлари билан шуғулланишса, тўғри бўлар эди”, дея Захаровага жавоб қайтарган “Миллий тикланиш” партияси депутати Алишер Қодиров. Кейин россиялик сенатор Андрей Климов чиқиш қилиб, Ўзбекистонга Украина тақдири ҳақида эслатган.
2023 йил декабрда россиялик ёзувчи Захар Прилепин собиқ СССР ҳудудларини Россия таркибига қўшиб олишни ва унинг аҳолисига рус тилини ўргатишни таклиф қилиб чиққанди. Бунга Россия Ташқи ишлар вазирлиги муносабат билдириб, Захар Прилепин баёноти унинг шахсий фикри эканини маълум қилган.
Ўтган йили яна бир россиялик депутат Евгений Фёдоров собиқ совет республикаларини СССРдан “ноқонуний равишда ажралиб чиққан”ини айтиб, Россия эртами-кечми, улар билан конфликтга бориши ёки уришишини айтган.
Изоҳ (0)