Rossiyalik deputat Sergey Mironov O‘zbekistonning Qozon shahridagi Bosh konsulligi fuqarolarni Rossiya armiyasida xizmat qilmaslikka chaqirganidan so‘ng, O‘zbekiston bilan viza rejimini joriy qilish kerakligini aytgandi. O‘zbekiston jamoatchiligi bunga munosabat bildirdi.
Dastlab “Milliy tiklanish” demokratik partiyasi raisi Alisher Qodirov unga javob qaytardi.
“O‘zbeklardek barakali xalq haqqini mehnat qilib topadi, odam o‘ldirib emas”, deb aytdi deputat.
Rossiyani esa Mironovning o‘zi, o‘g‘illari, kuyovlari va nevaralari himoya qilishi kerakligini ta’kidladi. “Bilishimcha, ruslar ham Vatanni himoya qilishni o‘zbeklardagidek muqaddas burch hisoblaydilar”, dedi Alisher Qodirov.
Oliy Majlis deputati, “Yuksalish” harakati raisi Bobur Bekmurodov konsullik fuqarolarni O‘zbekistonda noqonuniy hisoblangan harakatlardan himoya qilishini tabiiy va adolatli, deb atadi va bunday tajovuzkor ritorika faqat ikki tomonlama munosabatlarga salbiy ta’sir ko‘rsatishini qayd etdi.
“Vatandoshlarimiz o‘z mehnatlari bilan Rossiyaning iqtisodiyotiga hissa qo‘shyapti. Ijtimoiy nafaqalarni inson hayotiga tahdid qiluvchi harakat bilan solishtirish savodsizlik va ahmoqlikdir”, deydi Bobur Bekmurodov.
Deputat O‘zbekiston bilan Rossiya o‘rtasidagi “Ittifoqchilik munosabatlari to‘g‘risida”gi shartnomaning 7-moddasida “...bir tomon fuqarolari va yuridik shaxslarining qonuniy huquqlari va manfaatlarini boshqa tomon hududida kafolatlaydigan samarali choralar ko‘radilar”, deb yozilganini eslatdi.
“Bizda qonunlar ishlaydi. Sizlarda ham shunday bo‘lishi kerak, o‘rtoq Mironov”, dedi Bobur Bekmurodov.
Holatga ekologiya vaziri maslahatchisi, jamoatchilik faoli Rasul Kusherbayev ham munosabat bildirdi.
“O‘zbekiston diplomatik idorasi O‘zbekiston qonunchiligida ko‘zda tutilgan normalarni o‘z fuqarolariga eslatgani uchun Rossiyadan viza rejimi joriy etish tahdidi yangrayotgani, Rossiya siyosatchilari O‘zbekistonni o‘zlariga qaram davlat sifatida ko‘rishini anglatmoqda.
Afsuski, yuqori martabali siyosatchining bu gaplari Rossiya tomoni O‘zbekiston bilan aloqalarni buzish uchun bahona qidirayotganini ko‘rsatmoqda”, dedi u.
“O‘zbekiston o‘z hududida ishlayotgan rus fuqarolarini O‘zbekiston manfaati uchun qayergadir urushga jo‘natganida Rossiya diplomatik vakolatxonalari indamay turisharmidi?”, deya savol berdi Kusherbayev. Shuningdek, u O‘zbekistonda ham qarshi tomonga nisbatan xuddi shunday viza rejimi joriy etish imkoniyati borligini unutmaslik kerakligini qayd etdi.
“Menimcha O‘zbekiston uchun nomaqbul shaxslar ro‘yxatiga Zaxarovadan so‘ng kim kiritilishi kerakligi ko‘pchilikka tushunarli bo‘lgan bo‘lsa kerak”, deya qo‘shimcha qildi Kusherbayev.
Izoh (0)