Россия Ташқи ишлар вазирлиги Ўзбекистонни РФга қўшиб олишни таклиф қилган рус ёзувчиси Захар Прилепин баёноти шахсий фикр эканини билдирди. Бу ҳақда вазирлик вакили Мария Захаровага хабар берди.
Захарова бу каби баёнотларга изоҳ бериш сўровига жавобан Россия ва Ўзбекистонни ҳар томонлама стратегик шериклик ва иттифоқчилик муносабатлари боғлаб туришини таъкидлади. Дипломатга кўра, ёзувчининг Россиядаги меҳнат миграцияси тўғрисидаги чиқиши Москванинг расмий позициясини англатмайди.
“Юқоридагилардан келиб чиққан ҳолда, Прилепиннинг баёнотлари унинг шахсий фикри бўлиб, бу ҳатто Россия Федерациясининг расмий позициясини узоқдан ҳам акс эттирмайди”, — дейди Мария Захарова.
Шу билан бирга, у Россия ҳозирда “миграция соҳасидаги ҳамкорликни янада тартибли ва ўзаро манфаатли қилиш учун бир қатор тартибга солиш, ташкилий, ахборот ва бошқа чора-тадбирлар устида ишлаётганини айтди.
“Миграция масаласига келсак, Россия томони чет элдан, биринчи навбатда, дўст мамлакатлардан меҳнат ресурсларини жалб қилиш ҳам Россия, ҳам бундай хизматларни экспорт қилувчи давлатлар манфаатларига жавоб беришини бир неча бор таъкидлаган”, — деди Захарова.
Аввалроқ Прилепиннинг баёноти ортидан Россия элчиси Ўзбекистон Ташқи ишлар вазирлигига чақиртирилганди. Учрашувда элчига Россия каби дўст мамлакат партия раҳбарларининг бундай ўйламай билдираётган муносабатлари икки давлат ўртасидаги ҳар томонлама стратегик шериклик ва иттифоқчилик руҳига мос келмаслиги таъкидланган.
Россия элчиси Олег Малгинов тўлиқ масъулият билан Прилепиннинг баёнотлари “Россия раҳбариятининг дўст ва мустақил Ўзбекистон тўғрисидаги расмий позициясига умуман алоқаси йўқлигини” айтган.
Изоҳ (0)