Rossiyalik deputat Sergey Mironov O‘zbekistonning Qozon shahridagi Bosh konsulligi fuqarolarni Rossiya armiyasida xizmat qilmaslikka chaqirgani sababli O‘zbekiston bilan viza rejimini joriy qilish lozimligini aytdi.
Bosh konsullik ogohlantirishida O‘zbekiston Jinoyat kodeksining 154-moddasiga ko‘ra “yollanish” — xorijiy davlat hududidagi qurolli to‘qnashuvlarda yoki harbiy harakatlarda qonunga xilof ravishda qatnashish jinoyat hisoblanishi, ushbu harakatlarni sodir etganlik uchun javobgarlik 10 yilgacha ozodlikdan mahrum qilishni nazarda tutilishi eslatib o‘tilgan.
“O‘zbekistonning Qozondagi Bosh konsulligi O‘zbekiston fuqarolarini Rossiya armiyasi saflariga qo‘shilmaslikka chaqirdi. Nega ular sizni onalik uchun suyunchi pulini olmaslikka undamadi? Boshqa imtiyozlardan foydalanish mumkin, lekin sizni boqayotgan mamlakatni himoya qilish mumkin emas. Viza rejimi bilan hammasi hal bo‘ladi! Bunday ‘fuqarolar’ bizga kerak emas”, deb yozgan Mironov X ijtimoiy tarmog‘idagi sahifasida.
Rossiya Jinoyat kodeksida ham boshqa davlat armiyasida xizmat qilish taqiqlangan. Buning uchun 12 yildan 18 yilgacha ozodlikdan mahrum qilish jazosi qo‘llaniladi.
Izoh (0)