Markaziy Osiyodan kelgan migrantlarga Rossiya fuqaroligini berishga vaqtinchalik moratoriy joriy etish taklif qilindi. Bu haqda “Adolatli Rossiya – haqiqat uchun” fraksiyasi rahbari Sergey Mironov ijtimoiy tarmoqlardagi sahifasida yozdi.
Parlament a'zosi “Adolatli Rossiya - Haqiqat uchun” 2022-yilda ham xuddi shunday tashabbus bilan chiqqanini eslatdi. Hozirda migratsiya muammolari keskinlashgan paytda, bu masalani ko'rib chiqishga qaytish kerak, deb hisoblaydi u.
Mironovning so‘zlariga ko‘ra, davlat “gastarbayterlarni ommaviy pasportlashtirish”ga qarshi turishi va milliy xavfsizlik sohasidagi o‘z manfaatlarini himoya qilishi kerak.
“Buning uchun Markaziy Osiyo mamlakatlari aholisiga Rossiya fuqaroligini berishga moratoriy joriy qilish zarur. Hech bo'lmaganda 2026-yilgacha. Va bu vaqt ichida qonunchilikni tartibga solish, migratsiya xizmatini isloh qilish, uni poraxo‘rlardan tozalash, shuningdek, avval berilgan pasportlarning qonuniyligini tekshirish mumkin”, — deya xulosa qildi deputat.
Avvalroq Federatsiya Kengashi vitse-spikeri Konstantin Kosachev xorijlik jurnalistlar bilan uchrashuvda rasmiylar migratsiya qonunchiligini takomillashtirishda kamsituvchi qarorlarga yo'l qo'ymasligini aytgan edi.
Kecha 3-avgust kuni Moskva yaqinida o‘tkazilgan reyddan so‘ng MDH davlatlari va Afrikadan kelgan 120 nafar muhojir Rossiyadan chiqarib yuborilishi haqida xabar berilgan edi. Ulardan 45 nafari O‘zbekiston fuqarolari ekani ma’lum qilingan.
Izoh (0)