Россиялик ёзувчи Захар Прилепин собиқ СССР ҳудудларини Россия Федерацияси таркибига қўшиб олишни ва унинг аҳолисига рус тилини ўргатишни таклиф қилиб чиқди. Унинг наздида мигрантлар муаммосини шундай йўл билан ҳал қилиш мумкин. Прилепиннинг таъкидлашича, “мигрантларни Россияда эмас, балки улар келган давлатларда, масалан, Ўзбекистонда ўқитиш керак.
Мен ҳазиллашаётганим йўқ. Биз Совет Иттифоқини қайта тиклаш мавзусини кўтарамиз. Бу бизга исталган вақтда: “Бизнинг икки миллион фуқаромиз сизнинг ҳудудингизда экан, биз сизнинг ҳудудингизга даъво қиламиз. Чунки кўпчилик аллақачон шу ерда, ҳаттоки бунга овоз беришган”, деб айтишга имкон беради, — дейди ёзувчи.
Мазкур чиқишга жавоб қайтарган Олий Мажлис депутати Иномжон Қудратов Захар Прилепиндан “дўстликка раҳна солмасликни” сўради.
Кайковуснинг Қобуснома асарида “Ақлсиз дўст ақллик душмандин ёмонроқдур”, деган нақл бор. Бу “дўст” дунёнинг кўпгина мамлакатларида нотинчлик юз бераётган, қонли можаролар авж олаётган, бунинг натижасида тинч аҳоли жабр кўраётган, уй-жойидан, мол-мулкидан айрилиб бошпанасиз, ҳимоясиз қолаётган айни замонда мамлакатимизда ҳукм сураётган тинчликка раҳна солиш ниятини билдирди. Жаноб Прилепин шуни яхшилаб ўқиб олинг! Ўзбекистон мустақил, суверен давлат. Уни босиб олишга, унда ўз ҳукмини ўтказишга, хорижий тил ўргатишга ҳеч кимнинг ҳаққи йўқ ва бундай сурбетлик билан эълон қилинган фикрлар на халқаро ҳуқуққа, на соғлом ақлга тўғри келади.
Аксинча, урушни тарғиб қилиш бу жиноятдир. Шуни ғурур билан айтамизки, мамлакатимизда тинчлик-тотувлик ҳукм сураётгани, бунёдкорлик ишлари изчиллик билан давом этаётгани, иқтисодимиз юксалаётгани, спортчиларимиз забт этаётган шоҳсупалар, эришаётган ютуқларимизнинг барча-барчаси мамлакатимиз қудратидан далолатдир. Бизнинг улуғ халқимиз муқаддас ҳуқуқимиз — мустақиллигимизни ҳеч кимга, ҳеч қачон бериб қўймайди! Мустақиллигимизни, суверенитетимизни, давлат чегараларимиз дахлсизлигини ҳимоя қилишга куч-қудратимиз ҳам, журъатимиз ҳам етарли, — дейди Олий Мажлис депутати.
Журналист ва блогер Муҳрим Аъзамхўжаев бу чиқишга жавоб қайтарар экан, “Келгусида мана шундай тентакликлар бўлмаслиги учун ҳам Ўзбекистонга умуман киритилмайдиган советпараст чет элликлар рўйхати шакллантирилиши ва очиқ танишишга имконли бир кўринишда эълон қилиниши керак — улар Ўзбекистонга келгани ҳамоноқ аэропортнинг ўзидан депортация қилиниши ва умуман қорангни кўрмайлик бу ерда, деб тушунтириб юборилиши шарт”, деди.
Бу рўйхатга дуч келган одам киритилавермайди, айнан хатти-ҳаракатлари, гапирган гаплари Ўзбекистон мустақиллигига таҳдид сифатида кўрилган шахслар асос билан киритилади, — дейди блогер.
Муҳрим Аъзамхўжаевга кўра, СССРни қайта тиклаш ҳақида гапириш бу — Ўзбекистонга, унинг мустақиллигига тажовуз қилишдек гап. Блогер ва ҳуқуқшунос Хушнудбек Худойбердиев эса “Бунақа ифлосларга Ташқи ишлар вазирлиги расмий жавоб бериши шарт ва зарур”, деди.
Биринчидан, бунақа аҳмоқларга, албатта, расмий жавоб берилиши керак. Турли нодавлат ташкилот вакилларининг баёнотлари билан чекланмаслик зарур. Албатта, расмий, давлат позициясини ифодаловчи, қатъий ва дадил жавоб бўлиши шарт. Иккинчидан, бунақа потенциал босқинчиларга Ўзбекистон Республикаси ҳудудий яхлитлигини конституцияга хилоф тарзда бузишга очиқдан очиқ даъват қилиш (Жиноят кодекси 159-модда) айби билан сиртдан жиноят иши қўзғаш керак. Бунинг учун барча етарли далиллар бор. Жиноят-процессуал кодексининг 322-моддасига кўра, оммавий ахборот воситалари берган хабарлар жиноят ишини қўзғатиш учун сабаб бўла олади.
Учинчидан, Муҳрим айтганидек, “СССР қандай парчаланган бўлса, ўша ҳолида тикланиши керак”, “СССР ноқонуний парчаланган, унинг парчаланиши ҳақидаги ҳужжатлар ноқонуний ва ҳақиқий эмас”, деган гаплар ҳам Ўзбекистон Республикасининг конституциявий тузумига тажовуз қилиш, дея баҳоланиши керак. Ўзбекистон ҳудудида ҳам кимдир шу каби гапларни айтса, албатта, жазоланиши шарт. Бошқача айтганда, Ўзбекистон мустақиллигини шубҳа остига қўядиган, Ватанимизни яна мустамлака қилишга олиб борадиган ҳар қандай тарғиботга аёвсиз чора кўрилиши керак. “Ҳа, майли энди, сўз эркинлиги бу, шахсий фикрини айтибди”, деган баҳоналар ўтмайди. Ҳар қандай сўз эркинлигининг чегараси бор. Ватан мустақиллиги мавзуси муқаддас бўлиши шарт ва зарур, бу мавзуда бошқача талқинларга ўрин йўқ, — дейди Хушнудбек Худойбердиев.
“Давлетовуз” Telegram канали муаллифи ҳам бу ҳолатга жавоб қайтариб, “Бундай таҳдидларга аниқ ва кескин жавоб қайтарилиши, Россия элчисидан изоҳ талаб қилиниши керак. Ва албатта, умрбод қора рўйхатга киритилиши лозим”, деб ёзди.
Изоҳ (0)