АҚШнинг талабалар ва бошқа турдаги визаларини олмоқчи бўлганларнинг ижтимоий тармоқлари текширилади. Бу ҳақда New York Times хабар берди.
Давлат котиби Марко Рубио консуллик ходимларига АҚШ ва Исроилни танқид қилишда гумонланганларнинг ижтимоий тармоқларини синчковлик билан текширишни буюрган. Алоҳида назоратга олинадиган виза турлари F, М ва J (талабалар, касбий таълим ва меҳмонга бориш учун визалар) ҳисобланади.
Қуйидаги шахсларнинг ижтимоий тармоқлардаги постлари синчиклаб текширилади:
- террорчилар билан алоқаси бор ёки уларга хайрихоҳлик билдиришда гумон қилинаётганлар;
- 2023 йил 7 октябрдан (ҲАМАС Исроилга ҳужум қилган ва Ғазодаги уруш бошланган сана) 2024 йил 31 августгача АҚШнинг талабалар ёки алмашинув дастури визасига эга бўлганлар;
- ёки визаси 2024 йил октябрь ойидан кейин бекор қилинганлар.
Белгиланган саналар шуни англатадики, асосий мақсадлардан бири — уруш давомида фаластинликларга ҳамдардлик билдирган талабалар аризаларини рад этишдир.
Шунингдек, агар ариза берувчининг хатти-ҳаракати ёки муносабати АҚШ фуқаролари ёки маданиятига нисбатан душманона муносабатда бўлса, унга виза берилиши рад этилиши мумкин.
АҚШдаги ноқонуний ўзбекистонликлар ўз ихтиёрлари билан қайтиши лозим
АҚШнинг Ўзбекистондаги элчиси Жонатан Ҳеник АҚШда ноқонуний бўлиб турган ўзбекистонликни ўз ихтиёри билан ватанга қайтишга чақирмоқда.
У сўнгги йилларда кўплаб ўзбекистонликлар Марказий Америка ҳудудидаги хавфли йўллар орқали АҚШга кирганини айтди. Оқибатда АҚШда ноқонуний бўлиб турган тахминан минглаб ўзбекистонликлар бор.
Очиғини айтганда, мен бу шахсларга Ўзбекистонга ўз ихтиёрлари билан қайтишни маслаҳат берардим. Чунки, акс ҳолда улар АҚШда қамоққа олиниши ёки депортация қилиниши мумкин, деган элчи.
АҚШда ноқонуний бўлиб турганлар депортация қилиниши
АҚШ президенти Дональд Трамп маъмурияти ноқонуний мигрантларни судсиз депортация қилишга рухсат берган. Трамп сайловолди кампаниясидаёқ муҳожирларни оммавий депортация қилишга ваъда берган. 2025 йил февралида Коста Рика Ўзбекистон, Қозоғистон, Қирғизистон, Покистон ва Ҳиндистон каби давлатларнинг АҚШдан депортация қилинган 200 нафар фуқаросини қабул қилишга рози бўлди.
Ўзбекистон ташқи ишлар вазири матбуот котиби Аҳрор Бурҳонов дипломатик ваколатхоналар Ўзбекистоннинг барча фуқароларига, улар қаерда бўлишидан қатъи назар, ҳар томонлама ёрдам кўрсатишини айтди. 2025 йил февралида 7 нафари Нью Йорк—Тошкент йўналиши бўйича Ўзбекистонга олиб келинди. Март ойи бошларида яна 10 нафар фуқаро АҚШдан Ўзбекистонга қайтарилди.
Депортация қилинадиган Ўзбекистон фуқаролари сони 975 кишини ташкил этмоқда. Умумий ҳисобда, турли давлатлардан 1 445 549 нафар чет эл фуқароси чиқариб юборилади. АҚШдан 2023 йил сентябрдан 2024 йил сентябргача Ўзбекистонга 572 киши депортация қилинган.
АҚШда мигрантлар учун ўз-ўзини депортация қилишга мўлжалланган илова ишга туширилган. CBP Home деб номланган мобил илова ноқонуний мигрантларга ҳибсга олинмасдан, мамлакатни мустақил равишда тарк этиш имконини беради. Улар кейинчалик қонуний равишда қайтиб келиши мумкин бўлади.
Изоҳ (0)