AQSHning talabalar va boshqa turdagi vizalarini olmoqchi bo‘lganlarning ijtimoiy tarmoqlari tekshiriladi. Bu haqda New York Times xabar berdi.
Davlat kotibi Marko Rubio konsullik xodimlariga AQSH va Isroilni tanqid qilishda gumonlanganlarning ijtimoiy tarmoqlarini sinchkovlik bilan tekshirishni buyurgan. Alohida nazoratga olinadigan viza turlari F, M va J (talabalar, kasbiy ta’lim va mehmonga borish uchun vizalar) hisoblanadi.
Quyidagi shaxslarning ijtimoiy tarmoqlardagi postlari sinchiklab tekshiriladi:
- terrorchilar bilan aloqasi bor yoki ularga xayrixohlik bildirishda gumon qilinayotganlar;
- 2023-yil 7-oktyabrdan (HAMAS Isroilga hujum qilgan va G’azodagi urush boshlangan sana) 2024-yil 31-avgustgacha AQSHning talabalar yoki almashinuv dasturi vizasiga ega bo‘lganlar;
- yoki vizasi 2024-yil oktyabr oyidan keyin bekor qilinganlar.
Belgilangan sanalar shuni anglatadiki, asosiy maqsadlardan biri — urush davomida falastinliklarga hamdardlik bildirgan talabalar arizalarini rad etishdir.
Shuningdek, agar ariza beruvchining xatti-harakati yoki munosabati AQSH fuqarolari yoki madaniyatiga nisbatan dushmanona munosabatda bo‘lsa, unga viza berilishi rad etilishi mumkin.
AQSHdagi noqonuniy o‘zbekistonliklar o‘z ixtiyorlari bilan qaytishi lozim
AQSHning O‘zbekistondagi elchisi Jonatan Henik AQSHda noqonuniy bo‘lib turgan o‘zbekistonlikni o‘z ixtiyori bilan vatanga qaytishga chaqirmoqda.
U so‘nggi yillarda ko‘plab o‘zbekistonliklar Markaziy Amerika hududidagi xavfli yo‘llar orqali AQSHga kirganini aytdi. Oqibatda AQSHda noqonuniy bo‘lib turgan taxminan minglab o‘zbekistonliklar bor.
Ochig‘ini aytganda, men bu shaxslarga O‘zbekistonga o‘z ixtiyorlari bilan qaytishni maslahat berardim. Chunki, aks holda ular AQSHda qamoqqa olinishi yoki deportatsiya qilinishi mumkin, degan elchi.
AQSHda noqonuniy bo‘lib turganlar deportatsiya qilinishi
AQSH prezidenti Donald Tramp maʼmuriyati noqonuniy migrantlarni sudsiz deportatsiya qilishga ruxsat bergan. Tramp saylovoldi kampaniyasidayoq muhojirlarni ommaviy deportatsiya qilishga va’da bergan. 2025-yil fevralida Kosta Rika O‘zbekiston, Qozog‘iston, Qirg‘iziston, Pokiston va Hindiston kabi davlatlarning AQSHdan deportatsiya qilingan 200 nafar fuqarosini qabul qilishga rozi bo‘ldi.
O‘zbekiston tashqi ishlar vaziri matbuot kotibi Ahror Burhonov diplomatik vakolatxonalar O‘zbekistonning barcha fuqarolariga, ular qayerda bo‘lishidan qat’i nazar, har tomonlama yordam ko‘rsatishini aytdi. 2025-yil fevralida 7 nafari Nyu York—Toshkent yo‘nalishi bo‘yicha O‘zbekistonga olib kelindi. Mart oyi boshlarida yana 10 nafar fuqaro AQSHdan O‘zbekistonga qaytarildi.
Deportatsiya qilinadigan O‘zbekiston fuqarolari soni 975 kishini tashkil etmoqda. Umumiy hisobda, turli davlatlardan 1 445 549 nafar chet el fuqarosi chiqarib yuboriladi. AQSHdan 2023-yil sentyabrdan 2024-yil sentyabrgacha O‘zbekistonga 572 kishi deportatsiya qilingan.
AQSHda migrantlar uchun o‘z-o‘zini deportatsiya qilishga mo‘ljallangan ilova ishga tushirilgan. CBP Home deb nomlangan mobil ilova noqonuniy migrantlarga hibsga olinmasdan, mamlakatni mustaqil ravishda tark etish imkonini beradi. Ular keyinchalik qonuniy ravishda qaytib kelishi mumkin bo‘ladi.
Izoh (0)