АҚШнинг Тошкентдаги элчиси Жонатан Хеник Alter Ego лойиҳасига берган интервьюсида Ўзбекистон фуқароларига АҚШ визаси беришни рад этиш даражаси юқори эканига изоҳ берди.
Марказий Осиё давлатлари орасида Ўзбекистон фуқароларининг АҚШ визасини олиш учун берган аризалари рад этилиши бўйича иккинчи ўринда туради. Ҳатто Туркманистон фуқаролари ўзбекистонликлардан кўпроқ виза олади.
“Мен визалар берилиш сонини солиштирмайман, чунки бошқа давлатлар рақамлари билан таниш эмасман. Бироқ шуни айтишим мумкинки, биз учун юзма-юз суҳбатлар ўтказиш жуда қийин бўлган ковид давридаги турғунликдан сўнг ўтган йили кўпроқ одамлар билан суҳбатлашдик ва 2022 йилда коронавирусдан олдинги 2019 йилдагидан кўра кўпроқ виза бердик. Биласизми, биз тўлиқ ишга қайтдик ва ҳар қачонгидан ҳам кўпроқ одамлар билан суҳбатлашяпмиз. Талабгорлар сони ҳар қачонгидан ҳам кўплиги аслида жуда яхши белгидир”, — дейди Хеник.
Элчининг таъкидлашича, АҚШга саёҳат қилиш истагида бўлганлар, жумладан, талабалар ва тадбиркорлар сони ҳам ортиб бормоқда. Элчихона АҚШга боришни имкон қадар кўпайтириш ва осонлаштириш, шунингдек, икки давлат манфаатлари йўлида имкон қадар кўпроқ алоқа ўрнатиш ниятида.
Шу билан бирга элчи АҚШ кўплаб виза сўровларига шунчаки рад жавобини бериши, бунинг сабабини очиқламаслиги тўғрисидаги саволга ҳам жавоб берган.
“Афсуски, ҳар доим виза сўрови рад этиладиган одамлар бўлади. Ўйлайманки, сиз ҳам жуда яхши биласиз, сўнгги ойларда биз, масалан, Ўзбекистоннинг кўплаб фуқаролари Мексикага бориб, сўнг ноқонуний равишда АҚШ чегарасини кесиб ўтишга уринаётганига гувоҳ бўлдик. Мен улар бу ишни Disneyland’га бориш учун қилишган деб ўйламайман. Тўғрими? Улар буни АҚШда туристик виза бўйича қонуний бўлмаган иқтисодий имкониятларни кўрганлари учун қилади”, — дейди элчи.
Жонатан Хеникнинг таъкидлашича, Ўзбекистоннинг миллионлаб фуқаролари мамлакатдаги оғир иқтисодий вазият туфайли оиласини боқиш учун Россияда меҳнат қилмоқда.
“Ва, табиийки, Ўзбекистон фуқаролари АҚШ ва бошқа мамлакатлардан иқтисодий имкониятларни излайди. Лекин, албатта, сиз биласизки, АҚШ Конгресси томонидан бизга қўйилган мажбуриятлар бор ва биз АҚШга виза билан борадиган ҳар бир киши, сайёҳлик визаси бўладими ёки талабалик визаси бўладими, бу визалар билан қонуний равишда саёҳат қилишига ишонч ҳосил қилишимиз керак. Шунинг учун, кимдир виза учун мурожаат қилса, лекин биз унинг нияти АҚШга сайёҳ сифатида саёҳат қилиш эмас, бошқа нарса эканлигини билсак, афсуски, қонун бўйича унинг сўровини рад этишимиз керак бўлади”, — деб тушунтирди у.
Дипломатнинг қайд этишича, 2022 йилда АҚШнинг Тошкентдаги элчихонаси “ҳар қачонгидан ҳам кўпроқ визаларни расмийлаштирган”.
2022 йилда АҚШнинг Тошкентдаги элчихонаси мурожаат қилган Ўзбекистон фуқароларининг 47,04 фоизига Б тоифали виза (сайёҳлик ва ишбилармонлик визаси) беришдан бош тортган. Бу 2021 йилдаги 45,98 фоизлик кўрсаткичдан юқори, аммо 2020 йил пандемия давридаги — 74,14 фоиз, 2019 йилдаги — 68,06 фоиз, 2018 йилдаги — 61,76 фоиз ва 2017 йилдаги — 50,29 фоиздан кам.
Изоҳ (0)