Россия ташқи ишлар вазири Сергей Лавров бошчилигидаги Россия делегацияси бир неча кундан кейин ўтказиладиган Бирлашган Миллатлар Ташкилоти Хавфсизлик кенгаши йиғилишида иштирок этиши керак, аммо АҚШ ҳукумати уларга ҳалигача виза бергани йўқ. Бу ҳақда Россиянинг АҚШдаги элчиси Анатолий Антонов маълум қилди, деб ёзмоқда CNN.
“Биз Вашингтонни делегациямизга, жумладан, журналистларимизга визалар беришни кечиктирмасликка чақирамиз. Виза беришдан бош тортиш БМТ бош офиси жойлашган давлат сифатида АҚШнинг мажбуриятларини бузади ва жаҳон ташкилотининг тўлақонли фаолият юритишига тўсқинлик қилади”, — деди Антонов.
Россиялик дипломат, шунингдек, АҚШ Россия делегациясини олиб борадиган самолётнинг мамлакатга киришига ҳали розилик бермаганидан шикоят қилди.
“Биз америкаликларнинг ҳеч қандай шарт ва чекловларсиз зудлик билан самолётга (АҚШ ҳаво ҳудудига кириш учун) рухсат беришини кутиб қоламиз”, — деди у.
Маълумот ўрнида БМТ қоидаларига кўра, АҚШ ушбу ташкилотга мезбонлик қилувчи давлат сифатида БМТ ишида иштирок этувчи ҳар қандай давлат делегациялари аъзоларига, улар билан икки томонлама муносабатлардан қати назар, виза беришга мажбур.
Россия вақтинча БМТ Хавфсизлик Кенгашига раҳбарлик қилади
Апрель ойида Россия қоида бўйича бир ойлик ротация доирасида БМТ Хавфсизлик Кенгашига раҳбарлик қилишни бошлади. Гарчи бу БМТ ишига тубдан таъсир қилмаса-да, Россиянинг Украинадаги босқини сабаб кўплаб давлатлар бундан норози.
Украина раҳбари Владимир Зеленскийнинг сўзларига кўра, бу “бемаъни ва бузғунчи” вазият БМТ каби халқаро хавфсизлик институтларининг “тўлиқ банкротлиги”дан далолат беради.
АҚШнинг БМТдаги вакили фикрича, Россия умуман ташкилот Хавфсизлик Кенгашидан чиқариб юборилиши керак.
Изоҳ (0)