АҚШ Россия ташқи ишлар вазири Сергей Лавровга Нью-Йорк сафарида ҳамроҳлик қиладиган россиялик оммавий ахборот воситалари ходимларига виза бермади. Бу ҳақда Россия ТИВ матбуот котиби Мария Захарова маълум қилди.
Захарова Лавровнинг Россия делегацияси АҚШга учишидан олдин аэропортда йўллаган мурожаатини эълон қилди. Вазирнинг таъкидлашича, Америка томони виза беришдан бош тортиб, “қўрқоқлик, аҳмоқлик қилди ва сўз эркинлигини ҳимоя қилиш борасидаги қасамёдларининг баҳоси қанча эканини кўрсатди”.
“Энг муҳими, ишончингиз комил бўлсин: биз буни унутмаймиз, кечирмаймиз”, — деди Лавров РТ, “Известия” ва АҚШ визаси берилмаган бошқа ОАВ ходимларига мурожаат қилиб.
Россия дипломатик манбасининг Россия давлат ОАВларига айтишича, америкалик журналистларга нисбатан муносабат ҳам “худди шундай” бўлади, “америкалик журналистлар барча ноқулайликларни бошдан кечиришига ҳеч қандай шубҳа бўлмаслиги керак”.
Аввалроқ журналистлардан ташқари Россия делегациясининг айрим аъзоларига ҳам визалар берилмагани хабар қилинганди. Лавровнинг ўзига ҳам узоқ вақт виза берилмаган.
Апрель ойида Бирлашган Миллатлар Ташкилоти Хавфсизлик кенгашига Россия раислик қилмоқда. Бунга Украина ва Европа Иттифоқи қарши чиққан. Сергей Лавров АҚШга ташрифи доирасида 24 ва 25 апрель кунлари Хавфсизлик кенгаши мажлисларида иштирок этади.
Изоҳ (0)