Исроил ўзининг энг йирик савдо ҳамкори бўлган АҚШдан импорт қилинадиган маҳсулотлар учун божхона тўловларини бекор қилди. Бу ҳақда Anadolu хабар берди.
Қарор бош вазир Биньямин Нетаньяху бошчилигидаги ҳукумат томонидан қабул қилинган. Бош вазир девони, Молия вазирлиги ҳамда Иқтисодиёт ва саноат вазирлиги қўшма баёнот эълон қилган. Унга кўра, 1985 йилда АҚШ билан имзоланган эркин савдо битими доирасида Исроил ҳозирда ушбу мамлакатдан импорт қилинадиган маҳсулотларнинг 99 фоизига бож солмайди.
2024 йилда Исроилдан АҚШга товарлар экспорти 17,3 миллиард доллар, хизматлар экспорти эса 16,7 миллиард долларни ташкил этди.
Америка маҳсулотларига божхона тўловларини бекор қилиш менинг ҳукуматим олиб бораётган бозорни рақобатга очиш, иқтисодиётни диверсификация қилиш ва яшаш нархини пасайтиришга қаратилган сиёсатининг навбатдаги қадами. Бу нафақат иқтисодий фойда келтиради, балки Исроил ва АҚШ ўртасидаги иттифоқни янада мустаҳкамлаш имконини ҳам беради, дея изоҳ берди Исроил бош вазири Биньямин Нетаньяху.
Молия вазири Бэтсалел Смотрич эса бу борада шундай деди:
Божхона тўловларининг бекор қилиниши Исроил учун фойдали бўлади. Бу ҳукуматнинг яшаш нархининг ошишига қарши курашиш сиёсатига мос келади. Ҳатто озиқ-овқат соҳасида ҳам рақобат кучаяди, деди у.
Эътиборлиси, Исроил бу қарорни АҚШнинг жавоб тарифларини жорий этиш тўғрисидаги қарори кучга киришидан сал олдин қабул қилмоқда. Президент Дональд Трамп 2 апрелдан “ўзаро” (“жавоб”) тарифлар жорий этишни режалаштирмоқда. Бу Америка товарларига божлар солган, Америка корхоналари, ишчилари ва истеъмолчилари учун “адолатсиз ва камситувчи” солиқлар ўрнатган мамлакатларга таъсир қилади. Оқ уйга кўра, бундай чоралар АҚШнинг савдо муносабатларини мувозанатга келтириш, маҳаллий саноатни ривожлантириш ва Трампнинг турли сайловолди ваъдаларини, жумладан солиқ енгилликларини амалга ошириш учун зарур маблағларни таъминлашга ёрдам бериши керак.
Изоҳ (0)