АҚШ президенти Жо Байден маъмурияти зудлик билан Мексика чегарасидаги деворнинг қурилишини қайта бошлаши керак. Бу ҳақда АҚШнинг собиқ президенти Дональд Трампнинг собиқ матбуот котиби Шон Спайсер Twitter’ида эълон қилинган баёнотига таяниб, «РБК» хабар берди.
«Биз Байден маъмуриятига тарихдаги энг хавфсиз чегарани топширганимиздан фахрланамиз. Фақат бу узлуксиз тизимнинг автопилотда ишлашига рухсат берилиши керак эди. Бунинг ўрнига, бир неча ҳафта ичида Байден маъмурияти миллий ғалабани миллий фалокатга айлантирди», — деди Трамп.
Унинг фикрига кўра, янги маъмуриятнинг хатти-ҳаракатлари одамларнинг ўлими ва фожиали воқеаларга, шунингдек, жанубий чегара орқали АҚШга гиёҳванд моддалар олиб кирилишига сабаб бўлди. Трампнинг фикрига кўра, расмийлар зудлик билан девор қурилишини якунлаши керак. У буни бир неча ҳафта ичида амалга ошириш мумкинлигини таъкидлади.
Аввалроқ АҚШ ички хавфсизлик вазири Алехандро Майоркас CNN телеканалига Қўшма Штатларга Марказий Америкадан сўнгги 20 йил ичида рекорд даражада ноқонуний муҳожирларнинг келиши кутилаётганини айтганди. Унинг фикрига кўра, содир бўлаётган воқеаларнинг асосий сабабларидан бири Трамп маъмуриятининг қарори билан ноқонуний муҳожирларни вақтинча жойлаштириш учун инфратузилмани қисман бекор қилиш бўлган.
Эслатиб ўтамиз, АҚШ президенти Жо Байден собиқ президент Дональд Трамп томонидан АҚШ—Мексика чегарасидаги вазият муносабати билан жорий қилинган фавқулодда ҳолатни бекор қилган эди. Аввалроқ Трамп Марказий Америка штатларидан келган ноқонуний муҳожирлар жиноятчилар эканига аминлигини билдирган.Шунингдек, АҚШ ва Мексика президентлари муҳожирлар ва коронавирусга қарши кураш бўйича ҳамкорлик қилишга келишиб олгани ҳақида хабар берилганди. Таъкидланишича, ҳар икки давлат раҳбарлари иқтисодий ўсишда, маданий хилма-хилликда муҳожирларнинг муҳим ўрнини эътироф этган ва мигрантларнинг қадр-қимматини тан оладиган, хавфсиз ва мунтазам иммиграция сиёсатига содиқлигини эълон қилган.
Изоҳ (0)