АҚШ қуролли кучлари 15 апрель куни Яман ҳусийларининг ҳарбий истеҳкомларини бомбардимон қилди. Бу ҳақда Яқин Шарқ манбаларига таяниб, Anadolu нашри хабар берди.
Ҳусийлар нишонларига ҳужум ҳақида дастлаб АҚШ Марказий қўмондонлиги хабар берган. Ғарб ҳужуми ҳусийларнинг 13 апрель куни Адан кўрфазига ракета учиришига жавобан амалга оширилгани маълум қилинган.
“13 апрель куни маҳаллий вақт билан соат 19:00да Эрон томонидан қўллаб-қувватланган ҳусий террорчилар Ямандаги ўзлари назорат қилаётган ҳудуддан Адан кўрфази томон кемага қарши баллистик ракеталар (АСБМ) учирдилар. Коалиция қўшинлари бунга жавоб қайтарди”, — дейилади қўмондонлик хабарида.
АҚШ расмийлари маълум қилишича, қуролли кучлар махсус операция давомида ҳусийларга тегишли дронларни уриб туширган. Рақибнинг муҳим стратегик нуқталарига ҳужумлар муваффақиятли амалга оширилган.
Яман ҳусийлари гуруҳи 7-октябрдан бери Исроил ҳужуми остида бўлган Ғазо сектори билан бирдамлик кўрсатиш учун Қизил денгизда исроиллик компанияларга тегишли бўлган юк кемаларига ҳужумлар уюштириб келмоқда. Нефть ва ёқилғи ташиш учун дунёда энг кўп фойдаланиладиган Қизил денгиз йўли ҳусийлар томонидан тўсиб қўйилган.
АҚШ мудофаа вазири Ллойд Остин ҳусийлар ҳужумларига қарши туриш учун кўп миллатли миссия ташкил этилишини эълон қилган.
Изоҳ (0)