Исроил танклари 22 июль куни Ғазо сектори жанубидаги Хон Юнис шаҳрига ҳужум қилиши оқибатида камида 70 киши ҳалок бўлди. Бу ҳақда Al Jazeera нашри хабар берди.
Манбада айтилишича, Исроил армияси ҳудудга огоҳлантирмасдан қуруқлик ва ҳаво ҳужумлари уюштирган. Хон Юниснинг кўплаб ҳудудларига танклар киритилган.
Исроил ҳукумати Хон Юнисда янги операция бошланишини у ерда “террорчилар” тўплангани билан изоҳлаган. Уларни зарарсизлантириш учун махсус режа асосида ҳаракат қилингани айтилган.
Танклар ҳужуми оқибатида жами 200 дан ортиқ фаластинлик жароҳатланган. Уларнинг кўпчилиги Носир тиббиёт мажмуасига олиб келинган ва биринчи тиббий ёрдам кўрсатилган.
Ғазо соғлиқни сақлаш вазирлиги сўнгги ҳужумда 70 киши ҳалок бўлганини тасдиқлаган. Шаҳар вайроналарини тозалаш давомида жасадлар сони ортиши мумкин.
“Исроилнинг Хон Юнисга ҳужумида кун давомида 70 киши шаҳид бўлди, 200 дан ортиқ киши жароҳат олди. Ҳалок бўлганлар орасида аёллар ва болалар бор”, дейилади Ғазо Соғлиқни сақлаш вазирлиги душанба куни берган баёнотида.
Хабарда айтилишича, Исроил танклари Хон Юнисдан ташқари Бани Суҳайла ҳудудига ҳам ҳужум қилган. Ушбу ҳудуддаги аҳолидан ўз яшаш жойларини тез фурсатда тарк этиш талаб қилинган.
Изоҳ (0)