Тайванга ёпирилган “Данас” тайфуни икки кишининг ҳаётига зомин бўлди, жабрланганлар сони эса 500 нафардан ошган. Транспорт тизими издан чиқиб, энергетика инфратузилмаси жиддий шикастланган. Бу ҳақда Reuters агентлиги хабар бермоқда.
Бўрон марказида шамол тезлиги соатига 220 километрга етган. Айниқса, жануби-ғарбий туман катта зарар кўрган. Тайфун якшанба куни кечқурун илк бор шу ерда қуруқликка етиб келди. Таъкидланишича, бу ғайриодатий ҳолат, чунки тайфунлар одатда оролнинг шарқий қирғоқларига урилади.
Бўрон туфайли ғарбий соҳилдаги мактаблар ва корхоналар ёпилган, 700 мингга яқин хонадонда электр таъминоти узилган. Бутун мамлакат бўйлаб 700 дан ортиқ дарахт ағдарилган, йўл инфратузилмаси шикастланган, электр узатиш линияларининг бетон устунлари ва қадимий ибодатхоналардан бирининг дарвозаси вайрон бўлган.
Бундан ташқари, тайфун 300 дан ортиқ авиарейснинг бекор қилинишига ва тезюрар поездлар ҳаракат жадвалининг қисман бузилишига сабаб бўлган.
Тайван президенти Лай Сзин-де фуқароларни эҳтиёт чораларини кўришга чақирди.
Бундан аввал “Эрик” тўфони Мексиканинг Оахака штатига 4-тоифали хавфли бўрон сифатида ёпирилганди. Ҳудудда кучли шамол ва ёмғирларни қўзғатиб, мамлакатда йилнинг энг кучли бўрони деб топилди.
Июнь ойи ўрталарида Вьетнамнинг марказий қисмини қамраб олган тўфон шамоллари ва ёмғирлар оқибатида 5 киши ҳалок бўлган ва яна 2 киши бедарак йўқолганди.
Изоҳ (0)