Хитойда “Ҳайкуй” тўфонидан кейин юз берган сув тошқинлари чоғида мамлакат жанубидаги чорвачилик фермасидан ўнлаб тимсоҳлар қочиб кетди. Гуандун провинциясида жойлашган фермадаги кўл суви қирғоқдан тошиб кетган пайт 75 бош тимсоҳ озодликка чиққан.
Жониворларнинг баъзилари тириклайин қўлга олинган, бошқалари эса “хавфсизлик нуқтаи назаридан” маҳаллий ҳокимият томонидан отиб ўлдирилган ёки электр токи билан урилган.
Давлат матбуоти хабарларига кўра, ҳозиргача қочоқ жониворлар ҳукумат пистирмасидан муваффақиятли ўтиб кетмоқда: бор-йўғи саккизта судралиб юрувчи қўлга олинган. Ҳар эҳтимолга қарши яқин атрофдаги қишлоқлар аҳолисидан уйда қолиш сўралди.
“Ҳайкуй” тўфони бир ҳафтадан бери Осиёнинг жанубий ҳудудларини қамраб олмоқда, у аллақачон Гонконг, Тайван, Япония ва Хитойнинг баъзи ҳудудларига етиб борган.
Тўфон тропик бўрон даражасига тушди. Бироқ “Ҳайкуй” шу вақтгача етти кишининг ўлимига сабаб бўлди, яна уч киши бедарак йўқолган. Тўфон Хитой жанубида ҳам кўчки ва сув тошқинларига сабаб бўлди.
Давлат матбуотлари тимсоҳлар қочиб кетиши оқибатида ҳеч ким жабрланмагани ҳақида хабар берди. Бироқ расмийлар йиртқичларнинг баъзилари гавжум сув ҳавзаларида яширинган бўлиши мумкинлигини тан олди. Қутқарувчилар уларни қидириш учун гидролокацион аниқлаш аппаратларидан фойдаланмоқда.
“Ҳозирда вазият назорат остида, аммо қочиб кетган тимсоҳлар сони жуда кўп”, — деди ҳудуд Фавқулодда вазиятларни бошқариш бюроси расмийси.
Бюро маълумотларига кўра, фермадан 69 та катта тимсоҳ ва олтита ёш тимсоҳчалар қочиб кетган. Тhе Washington Post газетасининг ёзишича, қочоқлар — сиам тимсоҳлари. Буюк Британиядаги Crocodiles of the World ҳайвонот боғи маълумотларига кўра, уларнинг узунлиги уч метрга етиши мумкин.
Жониворларни қўлга олишда иштирок этган ўт ўчирувчилардан бири ОАВга ушланган катта тимсоҳларнинг ўртача оғирлиги 75 килограммга яқин, узунлиги эса 2 метрдан ортиқ эканини айтди. Унинг сўзларига кўра, қўлга олинган жониворларнинг аксарияти отиб ташланган.
Гуандон провинциясининг Маомин шаҳрида бир нечта тимсоҳ фермалари мавжуд. Улар териси ва гўшти учун боқилади.
Изоҳ (0)