Эрон ўт очишни тўхтатиш бўйича сулҳга эришилгач, Исроилни ҳужумларни тўхтатишга ва мағлубиятини тан олишга мажбур қилганини таъкидлади. Бу ҳақда Эрон Хавфсизлик кенгаши хабар берди.
Эрон ва Исроил ўртасида ўт очишни тўхтатиш Тошкент вақти билан 10:00 да кучга кирди.
Биз душманни пушаймон бўлишга, мағлубиятни тан олишга ва тажовузни бир томонлама тўхтатишга мажбур қилдик. Бизнинг қуролли кучларимиз душманнинг ҳар қандай ҳаракатларига қатъий ва оғриқли жавоб беришга тайёр, дейилади Хавфсизлик кенгаши баёнотида.
Шунингдек, баёнотда Эрон армиясининг “қўли ҳалигача тепки устида” тургани қайд этилган. Эрон ташқи ишлар вазири Аббос Ароқчи “Исроилни тажовузкорлиги учун жазолаш” бўйича ҳарбий операция якунланганини айтган.
Барча эронликлар билан биргаликда жонажон юртимизни сўнгги томчи қони қолгунча ҳимоя қилишга тайёр турган ва душманнинг ҳар қандай ҳужумига сўнгги дақиқагача жавоб қайтарган жасур Қуролли кучларимизга миннатдорлик билдираман, деб ёзган у Х ижтимоий тармоғида.
Исроил ҳукумати ҳам ўз баёнотида томонлар ўртасида ўт очиш тўхтаганини тасдиқлаган. Эронга қарши ҳарбий операциянинг барча мақсадларига эришилгани — яҳудий давлати учун экзистенсиал таҳдид бартараф этилгани таъкидланган. Сулҳ АҚШ президенти Дональд Трампнинг таклифи билан амалга ошган.
“Шер жасорати билан” операцияси Исроил давлатининг буюк тарихий ютуғи бўлиб, бизни дунё давлатлари қаторига олиб чиқди. Бу Исроил халқи ва аскарларининг буюк ғалабасидир, дейилади Исроил Вазирлар Маҳкамаси баёнотида.
Эрон билан 12 кун давом этган можарода 28 нафар исроиллик ҳалок бўлгани, яна мингдан ортиғи турли даражада жароҳатлангани маълум қилинди. Ислом республикасида эса можаро бошидан буён 400 нафар қурбон қайд этилган. Улардан 13 нафари болалардир.
Изоҳ (0)