Эквадорда машҳур “Los Choneros” жиноий тўдаси раҳбари “Фито” тахаллуси остидаги Хосе Адолфо Макиас 25 июнь куни қўлга олинди. Бу ҳақда Al Jazeera хабар берди.
У гиёҳванд моддалар савдоси ва қурол-яроғ контрабандаси айблови билан АҚШга топширилиши кутилмоқда. “Фито”нинг қўлга олингани ҳақида Эквадор президенти Даниэль Нобоа маълум қилган. “Фито” гиёҳванд моддалар савдоси ва қотиллик учун 34 йиллик қамоқ жазосига ҳукм қилинганди. Бироқ у 2024 йил январь ойида Гуаякил қамоқхонасидан қочиб кетган.
Шундан сўнг, уни қўлга олишга ёрдам берганларга 1 млн доллар мукофот эълон қилинган. “Фито”ни топиш учун минглаб полиция ва қуролли кучлар вакиллари жалб қилинган.
“Ушбу операцияда иштирок этган полиция ва ҳарбийларимизга миннатдорлик билдираман. Мамлакатни қайта тиклаймиз. Ҳеч қандай авф йўқ”, деди Нобоа.
Макиас қаттиқ режимли қамоқхонага ўтказилишидан олдин қочиб кетган, бироқ расмийлар бу қандай амалга ошганини маълум қилмаган. Унинг қочиши мамлакатда кенг кўламли тартибсизлик, портлаш, одам ўғирлаш, таниқли прокурорнинг ўлдирилиши ва жонли эфир пайтида телевидение тармоғига қуролли ҳужумга сабаб бўлганди. Шундан сўнг, президент Эквадор бўйлаб 60 кунлик фавқулодда ҳолат эълон қилганди.
Шунингдек, Эквадор президенти 22 та тўдани, жумладан “Los Choneros”ни “террорчилик гуруҳлари” деб атаган. АҚШ Молия вазирлиги 2024 йил февраль ойида Макиас ва “Лос-Чонерос”ни Эквадор бўйлаб гиёҳванд моддалар савдоси ва зўравонликни қўзғатгани учун санкция киритган.
Бир пайтлар Эквадор Лотин Америкасининг энг тинч давлатларидан бири бўлган. Аммо мамлакатнинг дунёдаги энг кўп кокаин ишлаб чиқарувчи Перу ва Колумбияга яқинлиги уни хорижга гиёҳванд моддалар экспорт қилувчи жиноий гуруҳлар учун асосий нишонга айлантирган.
Изоҳ (0)