Грецияда банан ичига яширилган 1 млн долларлик кокаин мусодара қилинди

Грецияда банан қутилари ичига яширилган 1 миллион долларлик қийматдаги кокаин тўхтатиб қолинди. Бу ҳақда Al Arabiya нашри хабар берди.

Манбада айтилишича, наркотик моддалардан иборат жўнатма Греция қирғоқ қўриқлаш хизмати томонидан фош қилинган. Махсус рейд давомида шубҳа туғдирган банан қутилари очиб кўрилганда улар ичида тақиқланган моддалар борлиги маълум бўлган.

Кокаин 5 август куни Грециянинг Пирей бандаргоҳига кириб келган кема ичидан топилган. АҚШнинг Афинадаги элчихонаси миллий хавфсизлик бўйича тергов бўлими олдиндан тақдим этган маълумотлар асосида операция ўтказиб, наркотик ташувчилар ҳибсга олинган.

Ҳибсга олинган кемадаги банан қутилари Эквадордан келтирилган. Қутилар ичига кокаин билан тўлдирилган 30 та пакет жойлаштирилган. Наркотик модданинг умумий оғирлиги 35 килограмм бўлган.

Хабарда айтилишича, Жанубий Америкада кокаин ишлаб чиқариш сўнгги ўн йил ичида ниҳоятда ўзган. У ердан жўнатилган наркотик моддалар эса асосан Болқон мамлакатлари, хусусан Греция орқали Европага ёйилмоқда.

Жорий йилнинг май ойида Греция расмийлари Лотин Америкасидан Европага контейнер жўнатиб, кокаин савдоси билан шуғулланувчи халқаро жиноий гуруҳ йўқ қилинганини маълум қилган эди. Ушбу баёнотдан бир неча кун ўтиб эса Пирей портига кириб келган бир кемада текширилган бошқа кемада музлатилган калмар қутилари ичига яширилган 109 килограмм кокаин қўлга олинган.