Буюк Британия B61-12 термоядровий бомбаларини таший оладиган F-35A қирувчи самолётларини сотиб олиш бўйича АҚШ билан музокараларни бошлади. Бу ҳақда юқори мартабали амалдорларга таяниб, The Times хабар берди.
Амалдорларга кўра, бу қарор Россия томонидан таҳдид кучайиб бораётгани сабабли қабул қилинган. Ташаббусни бош вазир Кир Стармер маъқуллаган. Қирувчи самолётларни сотиб олиш Буюк Британиянинг совуқ уруш давридан бери ядровий тийиб туриш тизимидаги энг муҳим ўзгариш бўлади.
Бундан аввал Лондон қироллик ҳарбий-денгиз кучларининг иккита авиаташувчиси учун АҚШнинг 48 та F-35B қирувчи самолётига буюртма берганди. Улардан 47 таси аллақачон қабул қилинган.
F-35A Light’нинг кўринмас қирувчи самолётлари узоқ масофани, жумладан, 1 400 километрни босиб ўтади. Улар ядровий тийиб туриш тизимининг иккинчи таркибий қисмига айланади. Улар тўғридан-тўғри жанг майдонида қўлланилиши мумкин, ҳозирда Британияда бундай имконият йўқ. F-35A Европанинг Eurofighter Typhoon қирувчи самолётлари ўрнини қисман эгаллайди. Британия ҳарбий-ҳаво кучлари 49 та шундай самолётни фойдаланишдан чиқаришни режалаштирмоқда.
Британия мудофаа вазири Жон Хили F-35A сотиб олиш бўйича музокараларга изоҳ беришдан бош тортган. Бироқ Британия “янги таҳдидлар даврига” мослашиши кераклигини айтган.
Дунё, албатта, хавфлироқ бўлиб бормоқда. Ядровий хавфлар ортиб бормоқда. Ва биз совуқ уруш тугаганидан бери биринчи марта давлатлараро можаронинг ҳақиқий таҳдидларига дуч келмоқдамиз, деган у.
Британия ядро қуроли Вангуард типидаги тўртта атом сув ости кемасига жойлаштирилган. Мамлакат ядровий арсенални кенгайтиришдан ташқари, ўқ-дориларни ишлаб чиқариш ва сотиб олиш учун 6 миллиард фунт стерлинг (8,1 миллиард доллар) сармоя киритади. Ушбу маблағнинг 1,5 миллиарди 1000 та иш ўрни билан таъминлайдиган олтита янги ҳарбий завод қурилишига сарфланади. Шунингдек, Қироллик флоти эсминец ва фрегатлар сонини 14 тадан 25 тагача оширмоқчи.
Изоҳ (0)