Россияда ҳарбий рўйхатга туришдан бўйин товлаган шахслар олдин олган фуқаролигидан маҳрум этилиши мумкин. Давлат Думасига тегишли қонун лойиҳаси киритилди.
Лойиҳа Дума Мудофаа қўмитаси раиси Андрей Картаполов бошчилигидаги депутатлар гуруҳи томонидан ишлаб чиқилган. У бир вақтнинг ўзида иккита амалдаги федерал қонунга — “Ҳарбий мажбурият ва ҳарбий хизмат тўғрисида” ҳамда “Россия фуқаролиги тўғрисида”ги қонунларга ўзгартишлар киритишни назарда тутади.
Хусусан, “асосли сабабсиз” ҳарбий ҳисобга туришдан бўйин товлаган шахсларга берилган паспортни қайтариб олиш таклиф этилмоқда. Ҳарбий комиссариат (военкомат) бундай ҳолатлар ҳақида Ички ишлар вазирлигига 5 кун ичида хабар бериши керак бўлади. Сўнгра вазирлик фуқароликни бекор қилиш масаласида қарор қабул қилади.
Агар фуқаро Ички ишлар вазирлигига хабарнома юборилганидан сўнг 30 кун ичида ўз ихтиёри билан ҳарбий комиссариатга мурожаат қилса, у фуқароликдан маҳрум этилмайди.
Ташаббускорларга кўра, қонун лойиҳаси 2024 йил августида қабул қилинган бошқа қонунни амалда татбиқ этиш заруратидан келиб чиққан. Ўша қонунга кўра, ҳарбий ҳисобга илк бор туриш мажбуриятини бажармаслик фуқароликдан маҳрум қилиш учун асос бўлиши мумкин. Бироқ ўша қонунда бу механизм қандай амалга оширилиши кўрсатилмаган эди.
Ўзгартиришлар ички ишлар органлари ва ҳарбий ҳисоб билан шуғулланувчи органларнинг биргаликдаги фаолияти самарадорлигини ошириш имконини беради, дейилади тушунтириш хатида.
Изоҳ (0)