Афғонистон шимолида, Марказий Осиё мамлакатлари билан чегарадош ҳудудларда кескин вазият сақланиб қолмоқда. «Толибон»нинг ўз чегаралари яқинидаги жанговар ҳаракатлари туфайли, Туркманистон улар томонга ўз қўшинларини тортиб бормоқда.
«Хроника Туркменистана» нашрининг мухбирлари маълум қилишича, ҳозир «военкомат» (ҳарбий комиссариат)ларга ҳарбий хизмат ўташдан вақтинчалик ёки доимий асосда озод қилинган шахслар учун навбатдан ташқари тиббий комиссия ўтказиш топширилган. Комиссиялар асоссиз равишда муҳлат берилган ёки армиядан озод этилган одамларни топиши керак.
Сўнгги бир неча кундан буён қишлоқ хўжалик бирлашмаларининг қишлоқ кенгашлари тунги биргача ишламоқда, дейилади хабарда. Уларга энг қисқа вақтлар ичида ўзларига қарашли қишлоқларда яшайдиган ҳарбий хизмат ёшидаги кишилар рўйхатини тақдим этиш топширилган. Шундай иш билан шаҳарларда полициянинг фуқароларни ҳисобга қўйиш ва рўйхатдан ўтказиш бўлимлари ҳам банд.
Охирги йилларда кўп сонли эркаклар мамлакатни тарк этган, баъзилари буни ноқонуний тарзда ҳам амалга оширган, аммо ҳужжатлар бўйича улар ҳамон Туркманистон ҳудудида рўйхатга олинган.
Ушбу маълумотлар Мудофаа вазирлигига тақдим этилади, муассаса айни пайтда армиянинг реал захираларини аниқлаштирмоқда.
«Азатлик» радиоси ҳам Ашхободда 40 ёшгача бўлган захирадаги ҳарбий хизматчилар «военкомат»ларга чақирилаётганини хабар қилди. Улар ҳозирча ҳарбий хизматга чақирилмаслиги ҳақида огоҳлантирилган, аммо юқори тайёргарлик даражаси ҳақида гапирилмоқда. Лебап вилоятида ҳам захирадагилар рўйхати тайёрланмоқда, у ерда «военкомат»лар кучайтирилган режимда ишламоқда. Биринчи ўринда рўйхатга десант ва танк қўшинларида хизмат қилган одамлар киритилмоқда.
Бундан ташқари, «Хроника Туркменистана» манбаларига қараганда, Ички ишлар вазирлигининг вилоятлардаги бошқармалари шахсий таркиби учун ҳафтада уч кун ҳарбий тайёргарлик бўйича машғулотлар, шу жумладан, автоматик қуролдан ўқ отиш машқлари ўтказилади.
«Военкомат»лар ҳарбий хизмат ёшидагилар учун тўрт ҳафталик ҳарбий йиғинлар ташкиллаштириш ва ўтказишга тайёрланмоқда.
Аввалроқ Туркманистон Ташқи ишлар вазирлиги матбуот хизмати Афғонистон чегарасидаги вазият юзасидан баёнот бериб, Россия оммавий ахборот воситаларини нотўғри ахборот тарқатишда айблаган эди. Таъкидланишича, Афғонистон билан чегарага Туркманистоннинг ҳарбий техникаси ва артиллериясининг жалб қилиниши ҳақида хабарлар ҳақиқатга тўғри келмайди.
«Хроника Туркменистана» газетаси 9 июль куни «Толибон» ҳаракати вакиллари Туркманистон билан чегара ҳудудидаги Афғонистоннинг Тургунди шаҳрини эгаллаб олгани ҳақида хабар берганди.
Туркманистон президенти Гурбангули Бердимуҳамедов 1 июль куни Хавфсизлик кенгашининг кенгайтирилган йиғилишини ўтказган, унда Афғонистон билан чегара ҳудудидаги ҳарбий сафарбарлик кучайтирилиши қайд этилган.
Изоҳ (0)